भांगरभूंय | प्रतिनिधी
रान खातें वाट पळयतात कर्नाटकाच्या पंगडाची
भांगरभूंय । प्रतिनिधी
पणजी : सिंधुदुर्गांतल्यान गोंयचे हद्दींत आयिल्ल्या हतयाक परतून ताच्या मूळ सुवातेर धांवडावपाच्या यत्नांक अजून मेरेन येस येवंक ना. हतयाक धरपाची तांक गोंयच्या राना खात्या कडेन नाशिल्ल्यान कर्नाटकाच्या राना खात्याची मजत घेवपाचो निर्णय जाला. हतयाक धांवडावपाचे यत्न चालूच आसले तरीय आतां आमी कर्नाटकाच्या पंगडाची वाट पळयतात, अशी म्हायती गोंयचे मुखेल राना संरक्षक (सीसीएफ) नवीन कुमार हांणी दिली.
गोंयांत आयिल्ल्या हतयान तांबोशें वाठारांत शेती तशेंच बागायतींचें खूब लुकसाण केलां. राना खात्याचो पंगड ताका धावडावपाचे यत्न करीत आसा, मात ताका अजून मेरेन येस येवंक ना. इतले मजगतीं गोंयचे राना खात्याचे मंत्री विश्वजीत राणे हांणी शेनवारा कर्नाटकाचे राना खात्याचे मंत्री ईश्वर खंद्रे हांचे कडेन बसका घेवन हतयाच्या प्रस्नाचेर चर्चा केली. हती मनशाच्या वाठारांत घुसतात. हाचेर उपाय काडपाचेर बसकेंत चर्चा जाली. हतयाक धरपा इतलें मनीसबळ तशेंच उपकरणां गोंयच्या राना खात्या कडेन नात. हतयाक धरपा इतली तांक आशिल्लें मनीसबळ कर्नाटका कडेन आसा. हतयाक धरपा खातीर खासा जतनाय घेवची पडटा. हतयाचेर उपचार करपी दोतोराची वेवस्था करची पडटा. कर्नाटकाच्या राना खात्या कडेन आमची चर्चा सुरू आसा. फावो ती मजत करपाचें उतर तांणी दिलां. उपकरणां सयत तांचो पंगड हतयाक धरपा खातीर येतलो. कर्नाटकाचो पंगड आयले बगर हतयाक धरप शक्य जावचें ना. ताका धरल्या उपरांत महाराष्ट्रांतूच सोडपाचो विचार आसा. आमच्या यत्नान हती गोंयचे हद्दी भायर गेलो जाल्यार कर्नाटकाच्या पंगडाची गरज पडची ना. मात तो गेलो ना जाल्यार ताका धरप कर्नाटकाच्याच पंगडाक शक्य जातलें, अशी म्हायती गोंयचे राना संरक्षक (सीसीएफ) नवीन कुमार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
