भांगरभूंय | प्रतिनिधी
म्हापशेंः हणजूणच्या रस्तो रूंदीकरण कामा विशीं पुलिशेंत आनीक एक कागाळ नोंद केल्या. आपल्याक नकळत आनी संमती बगर हें रस्तो रूंदीकरणाचें काम करपा वांगडाच मालमत्तेचेर अतिक्रमण केलां. आमचें कुटूंब आनी वाड्यावेल्या लोकांमदीं सौहार्दपूर्ण निर्णय जाय मेरेन काम बंद करचें, अशी मागणी कागाळदार शालिनी गोम्स हांणी हणजूण पुलिसां कडेन केल्या.
कुंभारवाडो हणजूणां सर्वे क्रमांक ४८४त पुर्वजांची मालमत्ता आशिल्ली शालिनी गोम्स हांणी आपले कागाळींत म्हणलां, रस्तो रूंदीकरणाच्या कामावेळार क्रॉस फाटले वटेन हालयता. हें आमचे परवानगेन जावंक ना आनी आमचे मालमत्तेचेर अतिक्रमणूय जाला.
आमचे म्हायती बगर हें काम सुरू आसा आनी म्हज्या कुटुंबा वांगडा हे विशीं कसलीच चर्चा जावंक़ ना. हाका लागून ह्या बेकायदो आनी घुसखोरी प्रकाराची खोलायेन चवकशी करात. फुडलें बांदकाम तशेंच रस्तो रूंदीकरण आडयात, अशी मागणी गोम्स हांणी हे कागाळी वरवीं केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
