भांगरभूंय | प्रतिनिधी
पणजीः एकवटान रावपी गोंयकारां मदीं फूट घालपाचो यत्न चल्ला. हणजूण ग्रामसभेंत जी दोतोर फर्नांडीसाक मारबडय जाल्या ती दुसर्या गांवांनी जावची न्हय, म्हूण पुलिसांनी जतनाय घेवपाक जाय. पुलिसांनी राजकारण्यांक राखण दिवची सोडून कायदो सुवेवस्था कायम दवरपाचेर भर दिवपाक जाय, अशी मागणी ‘गोंयचे फुडले पिळगे खातीर’ ह्या समाज वावुरपी पंगडान केली.
हणजूण ग्रामसभेत उलयतना डॉ. इनास फर्नांडीस हांकां मारबडय केल्ले घडणुकेचो निशेध करीत हे संघटणेन पुलीस महासंचालकांक निवेदन भेटयलें. हो विशय फकत हणजूण पुरतो मर्यादीत ना. मात पुराय गोंयांत कोसळत वचपी कायदो सुवेवस्थेचो हो प्रस्न आसा. जर हे घडणुकेचेर कारवाय जावंक ना जाल्यार हेर गांवांनी असल्या घडणुकांची पुनरावृत्ती जातली. कायदो सुवेवस्था तिगोवन दवरची म्हण पावलां मारचीं अशी मागणी आमी केल्या, अशें संघटणेचे वावुरपी जॅक फर्नांडीस हांणी सांगले.
हालींच पेडण्यां जाल्ली घडणुक पळयल्यार थंयसर दोन गट जाल्ले आमकां पळोवपाक मेळ्ळे. गोंयकारां मदीं फुट घालून तिसरो येवन थंयसर आपलो हेत सादपाक सोदता हें गोंयकारांनी समजून घेवपाक जाय. आमच्या गोंयकारांचो एकवोट काबार जावचो न्हय म्हण आमी आदले वरीं एकवटान रावया. फुडले पिळगेचें चिंतून लोकांनी बरें आनी वायट कितें हाचेर विचार करचो. कांय खिणांचे खोशये खातीर आमचे जिणेचो दर्जो होगडावया नाका, असो उलो जॅक हांणी मारला.
हे घडणुकेची जापसालदारकी आमी पुलीस महासंचालकाचेर दवरल्या आनी कारवाय करपाक कळाव जाला हें मान्य करून कायद्या प्रमाण फुडली कारवाय करपाचें आस्वासन दिलां. तांणी तशेंच उप पुलीस महानिरीक्षक वर्षा शर्मा हांणी सांगलें, हे विशीं कारवाय जातली आनी हे सारकिल्ल्यो घडणुको दुसर्या गांवांत जावच्यो ना हाची जतनाय घेतले. गोंयांत कायदो सुवेस्था आसची आनी सगळे गोंयकार बरे भशेन रावचे हें आमकां जाल्लें जाय, अशें जॅक हांणी सांगलें.
ग्रामसभा आनी पंचायतीचे हाजेरींत एका दोतोराक मारबडय करपा सारकिल्ली घडणूक आमी खंयचेच ग्रामसभेंत हाचे पयलीं पळोवंक ना. जो मारबडय करपी मनीस आसा तो घडणुके उपरांत परत परत पंचायतीच्या सालांत घुसपाचो यत्न करता. ताका ताब्यांत घेवन ग्रामसभेंत भितर सरपाक आडावपाक जाय आशिल्लें. मात सरपंच आनी पुलिसांनी कसलीच कारवाय करुंक ना, असो आरोप समाज वावुरपी जुझे मारीयान हांणी केलो.
पुलीस कायदो आनी सुवेस्था राखची सोडून फकत राजकी फामिलीक राखण दिवपा खातीर वावुरता. मारबडय करपी हो दुबावीत हो आपलो मनीस अशें आमदार मायकल लोबो स्पश्ट सांगता. हाचो अर्थ असो की मारबडय करपी मनशाक आमदाराचो तेंको आशिल्ल्यान पुलीस ताचेर कसलीच कारवाय करिना, असो आरोप मारीयान हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
