भांगरभूंय | प्रतिनिधी
म्हापशां : हणजूण- कायसूव पंचायत वाठारांतल्या नगर नियोजन कायद्याच्या कलम 39-अ चे तरतुदी प्रमाण केल्ल्या झोन बदलाचे सगळे प्रस्ताव भायरायल्यांत. गांवांतल्यो पाणथळ वाठार, कुरणां, रानांची जमीन, शेत जमीन आनी सीआरझेड वाठारा सारक्या पर्यावरण नदरेन संवेदनशील वाठारांत फुडाराक खंयचोय झोन बदलपाक परवानगी दिवची न्ही असो थाराव ग्रामसभेंत मंजूर केला.
सरपंच सुरेंद्र गोवेकार हांच्या अध्यक्षते खाला आयतारा जाल्ल्या ग्रामसभेंत पंचायत वांगडी, सचीव आनी थळावे व्हड संख्येन हाजीर आशिल्ले. वयल्या थारावाच्या ह्या मुद्याचेर चर्चा करपा खातीर पंचायत मंडळ, थळावे स्थानीक आमदारांचे एक शिश्टमंडळ बेगीन नगरनियोजन मंत्र्यां कडेन भेट घेवपाचो निर्णय ह्या वेळार घेतलो.
थळावो वांगडी जेरेमी फेरेरा हांणी प्रस्न उप्रासलो. नगर नियोजन कायद्याच्या कलम 39-अ खाला चार झोन बदलाचे प्रस्ताव पंचायतीक विस्वासांत घेयनासतना फुडें सरतात. ह्या प्रस्तावांच्यो फायल फकत पणजेंतल्या टिसीपी कार्यालयांत आसात. पंचायतींत नात. तशेंच वर्तमान पत्रांत जायरात कळावान येता. हरकत नोंद करपा खातीर लोकांक वेळ मेळना अशेय तांणी ह्या वेळार स्पश्ट केलें. पंचायतीन ह्यान पयली प्रस्तावांचेर हरकत घेतल्या. ते विशींचे पत्र मुख्यमंत्र्यांक धाडला अशे सरपंच गोवेकार हांणी ह्या वेळार म्हायती दिली. ह्या वेळार ग्रामसभेंत आनीकूय वेगवेगळ्या विशयांचेर चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
