भांगरभूंय | प्रतिनिधी
भांगरभूंय । प्रतिनिधी
म्हापशेंः आमचो पंगड समविचारी पंच वांगड्यांचो स्वतंत्र पंगड आसा. आमकां खंयच्याय आमदाराचो तेंको ना आनी आमी राजकी पक्षा कडेन संबंदीत नात. आमकां कोणाचोच शिक्को नाका अशें हणजूण- कांयसूंव पंचायतीच्या सत्ताधारी पंगडान स्पश्ट केलां. पंचायत वाठाराचे उदरगती खातीर राज्य सरकार आनी थळाव्या आमदराचें आमी मजत घेतले अशें ह्या गटान पत्रकार परिशद घेवन सांगलां.
म्हापशयांत आयोजीत केल्ले हे पत्रकार परिशदेक सत्ताधारी पंगडांतले सातूय पंच हाजीर आशिल्ले. सरपंच लक्ष्मीदास चिमुलकार, उपसरपंच अॅग्नेस कार्व्हालो, पंच वांगडी दिनेश पाटील, सुरेंद्र गोवेकार, स्मिता खोर्जुवेकार, शीतल नायक आनी सुदेश चिमुलकार हांणी हो खुलासो केला.
सोमाराक सरपंच आनी उपसरपंचपदाची निवड जातकूच आमी चा पिवपाक एके कडेन बशिल्ले तेन्ना थळावी आमदार डिलायला लोबो थंय आयली आनी तिणें आमकां परबीं भेययलीं. आमच्या वांगडा फोटे काडले. ते सोशल मीडियाचेर व्हायरल जाले. आनी हणजूण- कांयसूंव पंचायत मंडळाचो ताका तेंको आशिल्ल्याचो दावो केलो गेलो. हातूंत कांय तथ्य ना. आमचो समविचारी पंच वांगड्यांचो पंगड आसा. तातूंत सगळ्या राजकी पक्षांचे प्रतिनिधी आसात अशें सरपंच लक्ष्मीदास चिमुलकार हांणी सांगलें.
हणजूण, कांयसूव वाठारांत आवाजाच्या प्रदूशणाच्यो कागाळी येतात. न्यायालयान मार्गदर्शक तत्वांक पाळो दिवपाचो आदेश दिला. कारवाय करपाक पुलीस कमी पडटात. आमी आवाजा प्रदूशणाचेर नियंत्रण दवोरपाचो यत्न करतले अशें दिनेश पाटील आनी सुरेंद्र गोवेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
