भांगरभूंय | प्रतिनिधी
म्हापशें: वनाचेंभाट- हणजूण्यां पुलिसांनी ड्रग्ज विरोधी कारवाये खाला सान्यू फ्लोरन्स (28) आनी नबांकेमा अरीसाट (26) ह्या युगांडांतल्या चलयांक अटक केल्या. दुबावीत चलयां कडल्यान 1.61 लाखांचें कोकेन, एक्स्टसी आनी एमडीएमए हो ड्रग्ज जप्त केला.
ही कारवाय हणजूणें पुलिसांनी बुधवारा 8 फेब्रुवारीक सकाळीं 8.30 ते रातच्या 11.30 ह्या वेळा मदीं केलीं. गुप्तहेरांनी दिल्ले म्हायतीच्या आदारान पुलिसांनी ही धाड घातली. वयल्या दुबावीत विदेशी चलयां कडल्यान 45 हजारांचो 7 ग्राम एक्स्टसी, 84 हजारांचो 10.3 ग्राम कोकेन आनी 34 हजारांचो 3.4 ग्राम एमडीएमए मेळून 1 लाख 61 हजार 400 रुपयांचो ड्रग्ज सांपडलो. पुलिसांनी तो जप्त केलो आनी दुबावीत चलयां आड ड्रग्ज प्रतिबंधक कायद्याच्या कलमा खाला गुन्यांव नोंद केला. पुलीस निरिक्षक प्रशल नायक देसाय हांच्या मार्गदर्शना खाला उपनिरिक्षक स्नेहा सावळ, कॉन्स्टेबल लीना गोवेकार, वीना सावंत, प्रवीण पाटील आनी शंभा शेटगांवकार ह्या पंगडान ही कामगिरी केली. ह्या प्रकरणांत पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
