भांगरभूंय | प्रतिनिधी
म्हापशें: आवय घरकामा करताली त्या घरांतल्या पिटबूल जातीच्या सुण्यान केल्ल्या हल्ल्यांत प्रभास कळंगूटकार ह्या 10 वर्सां पिरायेच्या भुरग्याक मरण आयलें. बिरेस्तारादनपारच्या 3.30 वरांच्या सुमाराक पेडे, हणजूण्यां ही घडणूक घडली.
प्रभास आपले आवय वांगडा घडणुकेचे सुवातेर गेल्लो. ती त्या घरांत घरकाम करताली. ती घरांत काम करतना अचकीत पिटबूल जातीच्या पोशिल्ल्या सुण्यान प्रभासाचेर हल्लो केलो.
ह्या हल्ल्यांत प्रभासाच्या पोल्याचेर, मान, गळो, हाता- पांयाचेर अश्या भोवतेक आंगाक चाविल्ल्यान भुरग्याचें रगत व्हावपाक लागलें. ही घडणूक नदरेक पडटाच घरांतल्या लोकांनी ताकतिकेन ताका अॅम्ब्युलन्सींतल्यान म्हापशें जिल्हो हॉस्पिटलांत दाखल केलो. त्या भुरग्याची भलायकी हुस्क्याची आशिल्ल्यान ताका फुडल्या उपचारा खातीर तत्काळ गोमॅकाँत व्हेलो. थंय उपचार चालू आसतना सांजे वेळार ताका मरण आयलें. घडणुकेची म्हायती मेळटाच हणजूणेंचे पुलीस निरिक्षक सूरज गांवस आनी सांगात्यांनी घडणुकेचे सुवातेक भेट दिवन पंचनामो केलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
