भांगरभूंय | प्रतिनिधी
म्हापशें: गाववाडी, हणजूण्यां घरफोडी करून शिमोगा कर्नाटकांत पळ काडपी दोगां चोरांक पोळें- काणकोणां पुलिसांनी अटक करून 11 मोबायल आनी 1 मॅकबूक लॅपटॉप जप्त केलो. कुमार कृष्णाप्पा दोड्डेरी (20) आनी संदीप एन. (30) अशीं ह्या दुबावितांची नांवां आसून ते मूळ शिमोगांतले आसात.
ही चोरयेची घडणूक 18 नोव्हेंबर दिसा रातीं 8.50 ते 10 वरां मजगतीं घडिल्ली. ह्या प्रकरणांत विकास खडव (रा. राजस्थान) हांणी हणजूण पुलिशेंत कागाळ दाखल केल्ली. कागाळदार हे भाड्याच्या घरांतल्यान भायर सरिल्ल्याची संद सादून चोरांनी तांच्या घरांत प्रवेश केलो आनी भितरले दोन मोबायल आनी एक मॅकबूक लॅपटॉप मेळून वट्ट 2.35 लाख रुपया मोलाचो म्हालवज चोरलो.
पुलिसांनी सीसीटीव्ही फुटेजीची पडटाळणी केली तेन्ना ही चोरी चौगां चोरांनी केल्ल्याचें उक्तें जाल्लें. दुबावीत आरोपी काणकोण मार्गान कर्नाटकांत पळ काडपाचे तयारींत आशिल्ल्याची म्हायती खात्रेच्या गोपा कडल्यान मेळ्ळी.
ते प्रमाण हणजूण पुलिसांनी काणकोण पुलिसांचे मजतीन पोळ्यां तांकां धरले. उपरांत दुबावितांक पुलिसांनी रितसर अटक केली.
पुलिसांनी दुबावितां कडल्यान वयल्या वस्तूं सयत अजून णव मोबायल फोन ताब्यांत घेतले. ह्या वस्तूंचें मोल 4 लाख रुपया आसा. फुडलो तपास पुलीस निरिक्षक सुरज गांवस हांच्या मार्गदर्शना खाला उपनिरिक्षक साहील वारंग करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
