भांगरभूंय | प्रतिनिधी
जपानी पर्यटक लुबाडणूक प्रकरण; मंत्री रोहन खंवटेन केली गोंय पुलिसांची तोखणाय
भांगरभूंय । प्रतिनिधी
म्हापशें: वाडी शिवोले घडिल्ल्या जपानी पर्यटकाक लुबाडिल्ल्या प्रकरणाचो येसस्वी तपास केल्ले खातीर पर्यटन मंत्री रोहन खंवटे हांणी हणजूणें पुलिसांचें कवतूक केलें. तांणी चवकशी पंगडाक 50 हजारांचें इनाम जाहीर केलें. हणजूणें पुलिसांनी तपास करून तिगांक अटक केल्या.
बुधवारा दनपारां मंत्री खंवटे हांणी म्हापशें उपविभागीय पुलीस कार्यालयाक भेट दिली आनी प्रभारी उपअधिक्षक राजेश कुमार हांचे कडल्यान जपानी नागरीक लुबाडणूक प्रकरणांतले चवकशेचो तपशील समजून घेतलो. ह्या वेळार हणजूणें पुलीस निरिक्षक प्रशल नायक देसाय हाजीर आशिल्ले. मंत्री खंवटे हांणी ह्या वेळार पुलीस अधिक्षक निधीन वाल्सन, उपअधिक्षक जिवबा दळवी तशेंच हणजूणें पुलीस आनी गुन्यांव विभागाच्या पंगडान केल्ले कामगिरीची तोखणाय केली.
मंत्री खंवटे हांणी सांगलें, एका जपानी नागरिकाची लुबाडणूक जाले उपरांत जपाना कडल्यान हणजूणें हो दर्यादेग वाठार पर्यटकाक असुरक्षीत आसा, अशी आपल्या देशांतल्या नागरिकांक मार्गदर्शक तत्वां (अॅडव्हायसरी) काडिल्ली. पूण ह्या प्रकरणांत हणजूणें पुलीस स्टेशनाचेर कसलीच कागाळ येवंक नाशिल्ली. कागाळ आयले उपरांत आनी त्या जपानी नागरिकान केल्ल्या ट्विटराच्या आदारान गोंय पुलिसांनी ह्या प्रकरणाचो तपास करून दुबावितांक अटक केली.
गोंय हें पर्यटन स्थळ आशिल्ल्यान पर्यटकांक सुरक्षेची भावना दिवप आमची लागणूक. पुलिसांनी ताकतिकेन ह्या प्रकरणाच्या मुळा कडेन वचपाचो यत्न केलो. गोंय पुलिसांनी ह्या प्रकरणाचो योग्य तपास केलो. हणजूणें पुलीस तशेंच हेर अधिकाऱ्यांनी बरी कामगिरी केल्या, अशें खंवटे हांणी सांगलें. ह्या प्रकरणा विशीं पुलिसां कडल्यान आपणें स्थितीचो नियाळ घेतला. पुलिसांचे कामगिरीचेर आपूण समाधानी आसा. जपानी नागरिकाक गोंय पुलिशेन न्याय मेळोवन दिलां. ते खातीर पुलीस अधिक्षक, उपअधिक्षक आनी हणजूणें पुलिसांचें आपूण कवतूक करतां. तशेंच पर्यटन मंत्री ह्या नात्यान पुराय तपास पंगडाक आपूण 50 हजार रुपयांचें इनाम जाहीर करतां, जे वरवीं पुलिसांक उर्बा मेळटली. ह्या प्रकरणांतले दुबावीत हे गोंयकार न्हय. अशें तरेन नाडिल्ल्या पर्यटकांक ताकतिकेन न्याय मेळोवन दिल्यार गोंय हें सुरक्षीत पर्यटन स्थळ आसा, हो संदेश सगळ्यां मेरेन पावतलो, अशें खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
