भांगरभूंय | प्रतिनिधी
पणजी : हणजुणेंच्या सर्व्हे नं. 486/6 जमीन हडप प्रकरणांत गोंय पुलिशेच्या विशेश तपास पंगडान (एसआयटी) मुख्य सुत्रधार मोहम्मद सुहैल उर्फ मायकल फर्नांडीस हाचे सयत राजकुमार मैथी, रॉयसन्स रॉड्रिग्स आनी डेन्वर डिसोझा हांचे आड म्हापशें प्रथमवर्ग न्यायालयांत 569 पानांचें आरोपपत्र दाखल केलां. ह्या प्रकरणांत न्यायालयान दखल घेवन फुडली सुनावणी 24 नोव्हेंबराक दवरल्या. मजगतीं, एसआयटीन फाटल्या 15 दिसांत वयल्या दुबावितां आड आनीक तीन आरोपपत्रां दाखल केल्यात.
ह्या प्रकरणांत विल्मा डिसोझा हांणी कागाळ दाखल केल्ली. ते प्रमाण, तिच्या पुर्वजांची हणजूणेंची सर्व्हे नं. 486/6 तली 1875 चौखण मिटर जमीन आसा. ही जमीन दुबावीत ब्रांका दिनीज, पावलिना दिनीज, मारियानो गोन्साल्वीस आनी रॉयसन रॉड्रिग्स, मोहम्मद सुहैल उर्फ मायकल फर्नांडीस, राजकुमार मैथी, डॅन्वर डिसोझा आनी हेरांनी हडप केल्ल्याचें म्हणिल्लें. हाची दखल घेवन तेन्नाचे एसआयटीचे निरिक्षक सुरज सामंत हांणी वयल्या दुबावितां आड गुन्यांव दाखल केल्लो. ते परांत तांची बदली जाले उपरांत वयलें प्रकरण एसआयटीचे उपनिरिक्षक योगेश गडकार हांचे कडेन वर्ग केल्लें. तांणी ह्या प्रकरणांत 7 ऑगस्ट 2025 ह्या दिसा रॉयसन रॉड्रिग्साक अटक केली. ते उपरांत एसआयटीन मुख्य सुत्रधार मोहम्मद सुहैल उर्फ मायकल फर्नांडीस हाका अटक करून कारवाय केली.
मजगतीं, एसआयटीन तपास पुराय करून मुख्य सुत्रधार मोहम्मद सुहैल उर्फ मायकल फर्नांडीस हाचे सयत राजकुमार मैथी, रॉयसन्स रॉड्रिग्स आनी डेन्वर ड़िसोझा हाचे आड म्हापशें प्रथमवर्ग न्यायालयांत 569 पानांचें आरोपपत्र दाखल केलां. जाल्यार दुबावीत ब्रांका दिनीज, मारियामो गोन्साल्वीस आनी प्रेमानंद देसाय हाका मरण आयिल्ल्यान तशेंच दुबावीत पावलिना दिनीज हांचो आस्पाव नाशिल्ल्यान तांकां आरोपपत्रांतल्यान वगळ्ळ्यात. मजगतीं, वयल्या दुबावितां मदले राजकुमार मैथी आनी डेन्वर डिसोझा हे दोगूय फरारी आसात. एसआयटीन तांचे आड लूकआवट नोटीस जारी केल्या.
एसायटी कडेन सध्याचे स्थितींत 28 जमीन हडप प्रकरणां आसात. तातूंतल्या 17 प्रकरणांनी न्यायालयांत आरोपपत्र दाखल केलां. तीन प्रकरणांनी अंतीम अहवाल सादर केल्यात. जाल्यार न्यायालयान तीन गुन्यांव रद्द केल्यात. एसआयटीन 83 जाणांक अटक केल्या. तातूंतले 11 जाण वेगवेगळ्या प्रकरणांनी वांटेकार आशिल्ल्यान तांकां दरेका प्रकरणांत अटक केल्या. एसआयटीन फाटल्या 15 दिसांत मुख्य सुत्रधार मोहम्मद सुहैल उर्फ मायकल फर्नांडीस हाचे सयत राजकुमार मैथी, रॉयसन रॉड्रिग्स आनी डेन्वर डिसोझा हाचे सयत हेरां आड चार जमीन हडप प्रकरणांत आरोपपत्र दाखल केलां. तातूंत हणजुणेंच्या सर्व्हे नं. 37/3 तली 1850 चौ. मि. आनी 37/6 तली 3250 चौ. मि., आसगांवच्या सर्व्हे नं. 37/4 तली 2250 चौ. मि. जमीन आनी वयली हणजूणेंची सर्व्हे नं. 486/6 तली 1874 चौ. मि. जमनीचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
