भांगरभूंय | प्रतिनिधी
-एका सप्तकांत कृती अहवाल सादर करात, गोंय खंडपिठाचो आदेश
पणजीः हणजूण दर्यादेगेर बेकायदो उबारिल्लीं 38 बांदकामां एका सप्तका भितर मातये भरवण करची. तशेंच प्रतिज्ञापत्रा वरवीं दर्यादेगे वयल्या बेकायदो बांदकामां संदर्भांत सप्तका भितर कृती अहवाल सादर करचो, असो आदेश गोंय खंडपिठान हणजूणचे सरपंच, सचीव, नगर नियोजन खात्याचे अधिकारी, जीसीझॅडएमए आनी उपजिल्होधिकारी हांकां आयज दिला.
मजगती, 16 बेकायदो बांदकामां पाडली, अशें दिशाभूल करपी प्रतिज्ञापत्र हणजूण सचिवांनी उच्च न्यायालयांत सादर केल्ल्याचे अॅमिकस क्युरी अभिजीत गोसावी हांणी निदर्शनाक हाडून दिल्ले. पूण, ही बांदकामां अजून तशीच उबी आशिल्ल्याचो पुरावोय तांणी उच्च न्यायालयांत सादर केल्लो. हो विशय उच्च न्यायालयान गांभीर्यान घेतलो. हे संदर्भांत पंचायतीचे सचीव जितेंद्र नायक आनी आदले सचीव धर्मेंद्र गोवेकार हांकां 31 जानेवारी पयलीं प्रतिज्ञापत्र सादर करचें. तशेंच न्यायालयाची दिशाभूल करपी सचिवांचेर कितें कारवाय करतले, हे 31 जानेवारीक खंडपिठांत हाजीर रावन पंचायत संचालकांनी सांगचें, असो आदेश उच्च न्यायालयान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
