हणजूणेंच्या कर्लीस रेस्टॉरंण्टाक सील

भांगरभूंय | प्रतिनिधी

जीसीझॅडएमाची कारवाय; उरिल्लें बांदकाम लेगीत मोडटले

भांगरभूंय । प्रतिनिधी

म्हापशें : हणजूणें दर्यादेगे वयलें वादग्रस्त थारिल्लें कर्लीस रेस्टॉरंण्ट सील केलें. गोंय दर्यादेग वाठार वेवस्थापन प्राधिकरणान (जीसीझॅडएम) बार्देस मामलेदार कार्यालयाच्या आदारान पुलीस बंदोबस्तांत ही कारवाय केली. रेस्टॉरंण्टाचें उरिल्लें बांदकाम मोडपाच्या आदेशाची आतां जीसीझॅडएम कडल्यान कार्यवाही करतले.

रेस्टॉरंण्टाचें सर्वे नं. 42/12 तलें बांदकाम मोडपाचें काम अतिक्रमण पंगडान पुराय केलां. सध्या डेब्रीज काडपाचें काम चल्लां.

मेळिल्ले म्हायती प्रमाण, हणजूणेंच्या सर्वे नं. 42/9, 42/10, 42/11, 45/19 आनी 45/41 हातूंत आशिल्ली रेस्टॉरंण्टाची सगली वेवसायीक सुवात सील करपाचे आदेश जीसीझॅडएमान जारी केल्लो. वयल्या सर्वे नंबरांतलें बांदकाम सील करपाची सुचोवणी बार्देस उपजिल्होधिकाऱ्याक केल्ली. ते प्रमाण शुक्रारा 19 डिसेंबराक दनपारां उपजिल्होधिकाऱ्याच्या आदेशा प्रमाण बार्देस मामलेदार कार्यालयान जीसीझॅडएमचे अधिकारी, पंचायत तलाठी आनी हणजूणें पुलिसांनी बांदकाम सुवातेक भेट दिली. जीसीझॅडएमच्या अधिकाऱ्यांनी रेस्टॉरंण्टाच्या संबंदीत वास्तूची वळख पटयली आनी उपरांत रेस्टॉरंण्ट सील केलें. पर्यावरण संरक्षण कायदो कलन 5 आनी नेम 4 खाला ही कारवाय केली.

हे विशीं जीसीझॅडएमचे अधिकारी सचीन देसाय हांणी सांगलें, कर्लीस रेस्टॉरंण्ट सील केलां. बेगिनूच जीसीझॅडएम रेस्ट़रंण्टाच्या सगल्या वास्तूची मेजणी करतले. हें बांदकाम मोडपाचो आदेश आदींच दिला, मात कांय आडखळींक लागून मेजणी करपाक मेळूंक ना. ताका लागून आमी सुवात निश्चीत करपाक शकले नात. निमाणो आदेश जारी जाल्ल्यान ती सुवात सील केल्या. उरिल्लें बांदकाम मेजणी केले उपरांत मोडटले. ते मेरेन ही सुवात सीलबंद आसतली, अशें तांणी सांगलें.

मजगतीं, पर्यावरण संरक्षण कायद्या प्रमाण जुलय 2016 त जीसीझॅडएमान कर्लीस क्लब रेस्टॉरंण्टाचें बांदकाम मातये भरवण करपाचो आदेश दिल्लो. ह्या बांदकामा आड काशीनाथ शेट्ये हांणी ऑगस्ट 2015 त कागाळ दाखल केल्ली. ह्या आदेशाक एडवीन न्यूनीस हांणी हरीत लवादा कडेन याचिका दाखल केली तेन्ना लवादान जीसीझॅडएमाचो आदेश ग्राह्य धरिल्लो.

मजगतीं,गस्ट 2022 त कर्लीस क्लबांत भाजप फुडारी सोनाली फोगट हिका दुबावीत तरेन मरण आयिल्लें. पुलिसांनी ह्या प्रकरणांत खुनाचो गुन्यांव नोंद केल्लो. ह्या प्रकरणा उपरांत राज्य सरकारान जीसीझॅडएमच्या आदेशाची कार्यवाही करून कर्लीस क्लबाचेर अतिक्रमण हटाव कारवाय केल्ली. त्या वेळार सर्वे नं. 42/10 तली दोन माळ्यांच्या क्लबा वरी रेस्टॉरंण्ट मोडिल्लें. हे कारवायेक रेस्टॉरंण्टाचे जोडधनी लिनेट न्यूनीस हाणें सर्वोच्च न्यायालयांत आव्हान दिल्लें, तेन्ना हें प्रकरण परतून हरीत लवादा कडेन वर्ग केल्लें. सुनावणे उपरांत हरीत लवादान दावो केल्लो, दोन माळ्यांचें रेस्टॉरंण्ट जीसीझॅडएमए कायदो मोडून भरती रेशे भितर बांदलां. ते उपरांत जीसीझॅडएमान 31 ऑगस्ट 2015 ह्या दिसा सर्वे नं. 42/10, 42/9 आनी 42/11 तलें रेस्टॉरंण्ट मातये भरवण करचे खातीर कारणां दाखय नोटीस जारी केली.

सगली प्रक्रिया आनी दोनूय पक्षांची बाजू आयकून घेतले उपरांत जीसीझॅडएमान 21 जुलय 2016 ह्या दिसा सर्वे नं. 42/10 मदलें दोन माळ्यांचें रेस्टॉरंण्ट आनी ताचे फुडें हेर सर्वे नंबरांतवाड केल्ले मातये भरवण करपाचो आदेश जारी केलो. हे संबंदांत लिनेट न्यूनीस हाणें राष्ट्रीय हरीत लवादा कडेन याचिका दाखल करून वयल्या जीसीझॅडएमच्या आदेशाक आव्हान दिल्लें. मे 2024 त हरीत लवादान न्यूनीस हांची ही याचिका भायर मारली आनी जीसीझॅडएमाक वयल्या आदेशाची कार्यवाही करपाची मेकळीक दिल्ली.