भांगरभूंय | प्रतिनिधी
म्हापशेंः गुमालवाडा, हणजुण्यां गटारांत घाणयारें उदक सोडून गैरसोय निर्माण केल्ल्या आरोपान एका हॉटेलाक हणजूण-कायसूव पंचायतीन १० हजारांचो दंड केलो. थळाव्यांनी केल्ले कागाळीच्या आदारार पंचायतीन ही कारवाय केली.
संबंदीत हॉटेलांतले घाणयारें उदक पायपांचे मजतीन गटारांत उक्ताडार सोडिल्लें. हाका लागून २० थळाव्यांक घाणयारो वास सोंसचो पडलो.
थळावो ऍन्थनी डिसोझा हांणी हे विशीं थळावे आमदार, शिवोले मुळाव्या भलायकी केंद्राचे अधिकारी आनी हणजूण कायसूव पंचायतीकडेन कागाळ दाखल केल्ली. ते प्रमाण सरपंच लक्ष्मीदास चिमुलकार, पंच वांगडी सुरेंद्र गोवेकार हांचे सयत पंचायत सचिवांनी संबंदीत सुवातांचेर पळोवणी केली. उपरांत पंचायतीन हॉटेला कडल्यान १० हजार रूपया दंडाची रक्कम वसूल केली.
हें हॉटेल परत घाणयारें उदक गटारांत सोडल्यार २५ हजार आनी उपरांत ५० हजार रूपया दंड घेतले. उपरांत संबंदीत हॉटेल सील करतले, अशी म्हायती सरपंच लक्ष्मीदास चिमुलकार हांणी दिली.
मजगतीं, संबंदीत हॉटेलाच्या अधिकार्यांनी हें घाणयारें उदक न्हय, स्विमींग पुलांतलेञ उदक आशिल्ल्याचो दावो केलो. घाणयार्या उदकाचे प्रक्रिये उपरांत बांगकाम आनी मेकळे सुवातेर नितळसाण करपाक वापरता, अशें अधिकार्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
