भांगरभूंय | प्रतिनिधी
भांगरभूंय । प्रतिनिधी
म्हापशेंः दर्या देग नेम आनी नियंत्रणांचें उल्लंघन करून हणजुणे दर्या देग वाठारांत सध्या अनधिकृत बांदकामांक ओतो येवपाक लागला. मुंबय उच्च न्यायालयाच्या गोंय खंडपिठान दर्या देग वाठारांतली 175 बेकायदेशीर वेवसायिक आस्थापना बंद करपाचो आदेश दिल्लो तरीय बेकायदेशीर बांदकामां करपाचें बंद जायना अशी सध्याची परिस्थिती आसा.
ओझरांत- हणजुणे हांका दर्या देग वाठारांत, सनबर्न क्लबा लागीं रोमियो लेनी कडेन टायटल्सा सामकार आनी ग्लोरी रेस्टॉरन्टा कुशीक परत बेकायदेशीर बांदकामां जावपाक लागल्यात. विशेश म्हणल्यार पोरूं हीं बांदकामां मोडून उडयल्ली. सध्या चलिल्ल्या ह्या बांदकामांक लागून अनधिकृत बांदकामांचेर आळाबंद हाडपा खातीर वावुरपी सरकारी यंत्रणे सामकार आव्हान उबें केलां.
कोणाचीच भिरांत बाळगिनास्तना दर्या देग नियंत्रण कायद्याचें उक्तेंपणान उल्लंघन करून दोंगोर सपाट करून बांदकामां चल्ल्यांत. ओझरांत हागां दोगोर कापून एक बांदकाम चल्लां. जाल्यार एके कडेन दर्याचे सामके धडेर एक बांदकाम चल्लां. दिल्ली आनी उत्तर भारतांतल्या वजनदार व्यक्तींनी कायदेशीर आडमेळे पयस करपा खातीर आपल्या राजकी संबदाचो वापर करून हीं बांदकामां चलयल्यांत. ताका लागून गोंयची सरकारी यंत्रणा तांचे कडेन आडनदर करता असो आरोप थळावे लोक आतां उक्तेपणान करपाक लागल्यात.
कायदे आनी नेम पायां पोंदा माड्डून चलिल्ल्या ह्या बांदकामां कडेन संबंदीत अधिकारी फकत पळयत बसल्यात हे खातीर थळावे लोक सध्या तिडक उक्तावपाक लागल्यात. हणजुणे दर्या देग वाठारा म्हणल्यार सध्या कोणे येवंन किदेंय करचें असो जाला. दिल्ली आनी उत्तर भारतांतले लोक हांगा येतात आनी दर्या देग वाठारांत वेवसाय सुरू करतात. ह्या लोकांनी वेवसाय सुरू केलो जाल्यार आमचो ताका विरोध ना. मात कायद्यांक किंकोत करून ते जेन्ना बांदकामां करतात तेन्ना प्रस्न उप्रासता. बांदकामां करपाक बंदी आशिल्ल्या वाठारांत कोण कशीं बांदकामां करपाक शकता, अशे हणजुणच्या संदीप शिरसयकार हाचो प्रस्न आसा.
रोमियो लेनी फाटल्यान सुरू आशिल्ल्या बांदकामा कडेन एनओसी दिल्ल्याचो बोर्ड लायला. तात्पुरती कॉटेजी आनी रेस्ट्रो लाउंज. बांदपा खातीर ही एनओसी आसा अशें परवान्यांत नमूद केला. प्रत्यक्षांत जें बांदकाम चल्लां तें कायमस्वरुपी अशें दिसता. अशा वेळार अधिकारी करतात तरी किदें अशें ताणे सांगलें. बांदकामाक परवाने दिवचे पयलीं सगल्यो गजाली तपासून पळयतात अशें उच्च न्यायालयान थळाव्या पंचायत मंडळाक सागून लेगीत जाय तशे परवाने दिवपाचें काम सुरूच आसा. थऴाव्या पंचायत मंडळाक उच्च न्यायालयाची लेगीत भिरांत ना अशें दिसपाक लागलां अशें जुईश मोनिझ ह्या दुसऱ्या एका थळाव्यान सांगलें.
आमचें कांय चलना
हणजुणचो सरपंच लक्ष्मीदास चिमुलकार हाणे बेकायदेशीर बांदकामा आडावपा विशींची आपली असहाय्यताय उक्तायली. परवाने दितना तातूंत जायत्यो अटी लागू केल्ल्यो आसतात. तांका पाळो दितात काय ना हें पळोवपाव वतात तेन्ना सरकारी खातीं ताका स्थगिती आदेश दितात. ताका लागून कायद्याचें उल्लंघन करून चलिल्ल्या बांदकामांचेर कारवाय करप समाकें कुस्तार जाता अशें ताणे सांगलें. जेन्ना आमी कारवाय करतात तेन्ना दुसरे सरकारी खातें ताका स्थगिती दिता, अश्या वेळार आमचें कांय चलना, अशें चिमुलकारान विचारलें.
हणजुणे दर्या देग वाठारांत चलिल्लीं बेकायदेशीर बांदकामां आडावपाक पुराय सरकारी यंत्रणेक सामकें अपेश आयलां हें आतां दिसपाक लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
