भांगरभूंय | प्रतिनिधी
म्हापशें न्यायालयान केली तिगां दुबावितांची जामिनाचेर सुटका
म्हापशें ः हणजुणेंच्या सेंट मायकल वाड्यार बेकायदेशीरपणान घरांत घुसून कागाळदार ब्रॉन्वीन सिनारी कुटुंबाक घरांतल्यान भायर काडपाच्या प्रकरणांत अटक केल्ले तिगूय दुबावीत बावन्सरांची म्हापशें न्यायालयान सशर्थ जामिनाचेर सुटका केली. जाल्यार मुखेल दुबावीत जनार्दन खोराडे हांचो अटकपुर्व जामीन अर्ज न्यायालयान भायर मारलो.
सोमार १७ जानेवारीक दुबावीत राकेश नंदकिशोर राहा (३६, रा. सांखळे आनी मूळ उत्तरप्रदेश), परशुराम शंकर गांवस (४२, रा. वाडी नादोडा, बार्देस) आनी विकी विजय नायक (२०, इल्हास, पोरणें गोंय) ह्या तिगांची जामीन अर्ज सुनावणी जाली. उपरांत म्हापशें पयली श्रेणी न्यायालयान तिगांचीय सशर्थ जामिनाचेर सुटका केली.
मजगतीं, दुबावीत जनार्दन खोराडे हांच्या अजकपुर्व जामिनाचेर सोमारा १७ तारखेर म्हापशें अतिरिक्त जिल्लो आनी सत्र न्यायालयांत सुनावणी जाली. पुलीस आनी दुबावितांची बाजू आयकले उपरांत न्यायालयान हो अटकपुर्व जामीन अर्ज भायर मारलो.
मजगतीं, हो प्रकार फाटलो शेनवार ८ फेब्रुवारीक सकाळीं सुमार १०.४५ वरांचेर घडिल्लो. हे विशीं सोमारा १० जानेवारीक हणजूण पुलिसांनी जनार्दन खोराटे आनी अनवळखी १५ ते २० जाणां आड गुन्यांव दाखल केल्लो. उपरांत ह्या गुन्यांवा खाला वयल्या तिगां दुबावितांक अटक केल्ली.
मजगतीं, कॅनडा रावपी मायकल पीटर ह्या विदेशी नागरिकाच्या घरांत कागाळदार ब्रॉन्वीन सिनारी, घोव राजेंद्र सिनारी आनी तांचें कुटूंब रावतालें. घडणुके वेळार आपणें मालमत्तेचो मुखत्यार पत्रधारक (पॉवर ऑफ ऍटर्नी) आशिल्ल्याचो दावो करीत दुबावीत जनार्दन खोराडे हांणी १५ ते २० लोकांचे मजतीन घरांत गुन्यांवकारी तरेन घरांत घुसलो. उपरांत कुटुंबियांक धमकावन सगळें सामान भायर काडलें.
हातूंत वॉशींग मशीन, लॅपटॉप, प्रिंटर, सुटकेस, इलेक्ट्रॉनिक्स आनी घरगुती वस्तू तशेंच ३ लाख रूपया रक्कम अशा मालाची चोरी केल्ल्याचो आरोप हे कागाळींत फिर्यादींनी केल्लो.
मजगतीं, १४ जानेवारीक हें प्रकरण हणजूण पुलिसां कडल्यान फुडले चवकशे खातीर गुन्यांव फांट्या कडेन वर्ग केल्लें. हे विशीं फुडलो तपास गुन्यांव फांट्याचे पुलीस निरीक्षक निनाद देऊलकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
