भांगरभूंय | प्रतिनिधी
कारवाय करिना जाल्यार करतले धरणें आंदोलन: भराडी उदक वांटप समितीचें निवेदन
पडणें: हणखणें, पेडणेंच्या तिळारीच्या मुखेल कानाला शेजारच्या रस्त्यावेल्यान व्हडा प्रमाणांत जड वाहनांची येरादारी सुरू आसा. ही येरादारी बेगोबेग बंद करची, हे विशीं हणखणेच्या श्री भराडी उदक वांटप समितीन लेखी निवेदन सादर केल्लें. निवेदन सादर करून लेगीत कारवाय जायनाशिल्ल्यान फाल्यां म्हळ्यार मंगळारा १ एप्रिलाक धारगळेच्या उदकास्रोत खात्या मुखार एका दिसाचें धरणें आंदोलन करतले.
हणखण्यां एक सिमेंट कॉंक्रिटीकरण प्रकल्प आसा. ह्या प्रकल्पाचे कॉंक्रीट मिक्सर येरादारी करपी जड वाहनां तिळारीच्या मुखेल कानाला कुशीकच्या रस्त्यावेल्यान सदांच यो-वच करतात. तशेंच ह्या वाठारांत आशिल्ल्या खडी क्रशरा खातीर लागपी कच्चा मालाची येरादारी करपी ट्रकूय हेच वटेन येरादारी करतात. जड वाहनांक लागून हणखणेच्या तिळारी कानालाक धोको निर्माण जाला. कोट्यांनी रुपया खर्च करून उबो केल्ल्या ह्या कानालाक जड वाहनांक लागून वेरो गेल्यात.
हे विशीं हणखणेच्या श्री भराडी उदक वाटप समितीन २९ ऑक्टोबर २०२४ दिसा तिळारी कानाला कडेन संबंदीत जलस्रोत खात्यांतले अधीक्षक अभियंते शिरोडकार हांचे कडेन लेखी निवेदन सादर केल्लें. उपरांत संबंदीत अधिकार्यांनी हणखणेंच्या कानालाक भेट दिवन कानालाक गेल्ल्यो वेरो आनी कानाला शेजारच्या रस्त्यावेल्यान जावपी येरादारी हाची प्रत्यक्षांत पळोवणी केली. मात आजूनय ताचेर अपेक्षीत कारवाय जावंक ना.
उपरांत हणखणेंच्या श्री भराडी उदक वाटप समिती वांगड्यांनी परत अधिकार्यांची भेट घेवन चवकशी केली. मात जलस्रोत खात्यांतले तज्ज्ञ अधिकार्यांनी आडनदर केली. २०२५ वर्साचो मार्च म्हयनो सोंपलो तरे आजूनय कारवाय जावंक़ ना. म्हणून उदक वाटप समितीचे गोपाळ नायक हांणी मंगळारा १ एप्रिलाक एका दिसाचें धरणे आंदोलन करपाचो निर्णय घेवन ते विशींचें लेखी निवेदन अधीक्षक अभियंतो शिरोडकार हांकां दिलें. फाल्यां जलस्रोत खात्याचे अधीक्षक अभियंतो शिरोडकार हांच्या कार्यालया मुखार एका दिसाचें धरणें आंदोलन करतले. हाचे उपरांतूय योग्य कारवाय करूंक ना जाल्यार फुडाराक आमरण उपोशण करतले, अशें स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
