भांगरभूंय | प्रतिनिधी
पणजी: हडफडेंच्या व्हेगस सुपर मार्केटा लागसारा सकाळीं एके वेगान येवपी गाडयेन दुचाकीक धपको दिल्ल्यान दुचाकी चालकाक मरण आयलें. जाल्यार तेच गाडयेन थंयच्यान चलत वचपी बायलेकूय धपको दिलो. हातूंत ती बायल गंभीर जखमी जाली. गाडी चालकान अपघाता उपरांत थंयच्यान पळ काडलो. ह्या अपघातांत मरण आयिल्ल्याचें नांव अम्रुहीलोह्क अशें आसा.
हे विशीं चड म्हायती प्रमाण, अम्रुहीलोह्क हाचो मांस विक्रीचो वेवसाय आशिल्लो. तो साळगांवच्यान हडफड्यां मांस विकपाक वतना हो अपघात घडलो. वेगान आयिल्ले एके गाडयेन ताचे दुचाकीक धपको दिल्ल्यान ताका मरण आयलें.
हो अपघात घडिल्ल्या वेळार थंय हजर आशिल्ल्यांनी सांगिल्ले प्रमाण, दुचाकीक धपको दिले उपरांत ते गाडयेन एके बायलेकूय धपको दिलो. ह्या धपक्यान ती वडत मुखार वचून एका खांब्याक आपटली. तिका सध्या हॉस्पिटलांत व्हेल्या.
थळाव्यांच्या म्हणण्या प्रमाण वाहन चालक सोर्याचे नशेंत आशिल्ल्याचो अदमास आसा. सध्या पळून गेल्ल्या वाहन चालकाचो पुलीस सोद घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
