भांगरभूंय | प्रतिनिधी
मरप्यां मदीं 14 कर्मचारी आनी 4 पर्यटक
पणजी ः हडपडेंच्या बर्च बाय रोमिओ लेन ह्या नामनेच्या क्लबाक शेनवारां रातीं उसरां देडाक सुमार उजो लागलो. हातूंत आतां मेरेन 25 जाणांक मरण आयलां. इतल्या जाणांक एकाचवेळार मरण येवपाचो हो गोंयच्या पर्यटन इतिहासांतलो हो पयलोच प्रसंग आसुये. प्रधानमंत्री नरेंद्र मोदी, मुख्यमंत्री डाॅ. प्रमोद सावंत आनी थळावे आमदार मायकल लोबो हांणी हे घडणुकेचेर दुख्ख उक्तायलां. सरकार मरण आयिल्ल्यांच्या घरच्यांक सगली मजत करतलें अशें मुख्यमंत्री सावंत हांणी म्हणलां.
मजगतीं, पुलिसांनी तीन कर्मचाऱ्यांक अटक केल्या. तर क्लबाचे धनी सौरभ लुथरा, गौरव लुथरा आनी हेरां आड गुन्यांव दाखल केला.
उज्याची खबर मेळटकच उजो पालोवपी दळ, पुलीस, थळावे नागरीक, थंय बेगोबेग पावलें. तांणी मजतकार्याक सुरवात केली. पुलीस महासंचालक आलोककुमारुय थंय पावले. आतां उजो पालयला. मात तातूंत पुराय क्लब लासलो. मरण आयिल्ल्यांच्यो कुडी वळखुपा पलतडीं आसात. मरण आयिल्ल्यां मदीं 3 बायलो आसात. मरप्यां मदीं 14 कर्मचारी आनी 4 पर्यटक आसात. सात जाणांची वळख पटूंक ना अशें पुलिसांनी सांगलें. मजगतीं, तीन जखमींचीं नांवां कळ्ळ्यांत. ते उत्तराखंड, नेपाळ हांगाचे आसातक.
उजो नेमको कसो लागलो तें कळूंक ना. घडये शाॅर्ट सर्किट जाल्ल्यान हें जालां आसतलें, असो दुबाव आमदार लोबो हांणी उक्तायला. कामगारांच्या गोंयांतूच काम करपी सोयऱ्यांच्या मता प्रमाण, ‘नाच सुरू आसतना वयर लायटीचें शाॅर्ट सर्कीट जावन किट्ट्यो उसळून हो उजो लागलो. त्या बरोबर सगल्यांक भायर काडले. मात रांदचे कुडींतल्या कोणाक हें कळूंक ना. अचकीत उजो पेट्टकच ते लासले.’ एक बायल नाच करतनाचो व्हिडियो व्हायरल जाला, तातूंत वयल्यान लायटीक उजो लागून किट्टी पडटना दिसतात. घडये प्लास्टीक आनी माचयेक लागून उजो रोखडोच फांफसलो असो दुबाव आसा.
हे घडणुकेची म्हायती मेळटांच मुख्यमंत्री डॉ. प्रमोद सावंत, थळावे आमदार मायकल लोबो आनी पुलीस महासंचालक आलोक कुमार घडणुके सुवातेर पावले. तांणी परिस्थितीचो आढावो घेतलो.
वायट दीस
हो गोंयकारां खातीर खूब वायट दीस. प्रधानमंत्री नरेंद्र मोदी हांणी फोन करून हे घडणुके विशीं म्हायती घेतली. जांकां मरण आयलां, तांच्या कुटुंबांक गोंय सरकार पुराय मजत करतलें, अशें मुख्यमंत्री डाॅ. प्रमोद सावंत हांणी सांगलें.
सुरक्षेचो प्रस्न
गोंय हें देशांतलें आघाडेचें पर्यटन थळ, हो पर्यटनाचो मोसम. राज्यांतले क्लब, पब आनी हेर आस्थापनां सुरक्षे विशीं कितें उपाय घेतात काय नात, हाची सरकारान चवकशी करपाक जाय. कारण हाचो पर्यटनाचेर परिणाम जावंक शकता, अशें कांय थळाव्या नागरिकांनी सांगलें.
सरपंच ताब्यांत
हणजूण पुलिसांनी हडफडें- नागवेंचे सरपंच रोशन रेडकार हाकां ताब्यांत घेतले. ही खबर कळटकच थळावे तिडकून पुलिशेंत गेले. आपणें ह्या क्लबाच्या कसल्याक कामाक परवानो दिवंक नासतना आपणाक पुलिसांनी आडोवन दवरला, असो आरोप सरपंचान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
