भांगरभूंय | प्रतिनिधी
चवकशी समितीन ‘बर्च बाय रोमिओ लेन’ क्लबाची केली पळोवणी
पणजी : दंडाधिकाऱ्यांच्या फुडारपणा खाला स्थापन केल्ले चवकशी समितीन उजो लागिल्ल्या ‘बर्च बाय रोमिओ लेन’ क्लबाची पळोवणी करून सीसीटीव्ही फुटेजीचो डीव्हीआर ताब्यात घेतलो. डीव्हीआर मदल्या फुटेजीची फॉरेन्सीक विज्ञान फांटो तपास करतले. चवकशी समितीन क्लबाची पुराय तरेन पळोवणी करून यंत्रणे विशीं म्हायती जाणून घेतली अशी म्हायती चवकशी समितीचे अध्यक्ष आनी उत्तर गोंयचे जिल्होधिकारी अंकीत यादव हांणी दिली.
पुलीस, उजो पालोवपी दळाचे जवान, क्लबात ते वेळार आशिल्ले लोक, कर्मचारी हांची चवकशी करून उज्या विशींची पुराय म्हायती जाणून घेतले. क्लबांतली उजो पालोवपी यंत्रणा तशेंच हेर सुरक्षेच्या उपायांची स्थिती जाणून घेतले. अधिकारी, पंचायत हांची चवकशी करपाचे अधिकार समितीक आसा. कागदपत्रां तशेंच संबंदीतांची चवकशी करून सरकाराक अहवाल सादर जातलो, अशें जिल्होधिकारी अंकीत यादव हांणी सांगलें.
क्लबाक लागिल्या उज्याची दंडाधिकाऱ्या वरवीं चवकशी करपाचे आदेश मुख्यमंत्री डॉ. प्रमोद सावंत हांणी दिले उपरांत समिती स्थापन जाल्ल्याचो आदेश सोमारा जारी जालो. आदेश जारी जाले उपरांत चवकशी समितीच्या सगळ्या वांगड्यांनी क्लबाची पळोवणी करून चवकशेक सुरवात केली.
उत्तर गोंय जिल्होधिकारी अंकीत यादव हांच्या फुडारपणा खाला 4 वांगड्यांची चवकशी समिती स्थापन केल्या. दक्षीण गोंय पुलीस अधीक्षक टीकमसिंह वर्मा, फॉरेन्सीक सायन्स संचालक आशुतोष आपटे आनी उजो पालोवपी दळाचे उपसंचालक राजेंद्र हळदणकार हांचो आस्पाव आसा.
चवकशी समितीची जापसालदारकी :
० उज्याच्या कारणांचो सोद.
० आवश्यक परवान्यांचो तपास.
० एजन्सी/ खात्यांची जापसालदारी निश्चीत करून उपाय येवजणेंची शिफारस.
० खात्याकडल्यान रेकॉर्ड, कागदपत्रां मागपा सयत समन्स जारी करून चवकशीचे अधिकार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
