भांगरभूंय | प्रतिनिधी
भांगरभूंय । प्रतिनिधी
पणजीः गोंय पुलिसांच्या घुंवळी वखदा विरोधी पंगडान (एएनसी) हडफड्या हांगा छापो घालून इनोसेंट ओरेझुवानू अनारमेम (56) ह्या नायजेरीयन नागरिकांक अटक केली. ताचे कडेन आशिल्लीं 74 लाख 75 हजाराची (480 ग्राम कोकेन, 15 ग्राम एक्स्टसी पावडर आनी 250 ग्राम चरस) घुंवळी वखदां जप्त केली.
हडफड्यांत एक विदेशी नागरीक घुंवळी वखदांची तस्करी करपाक येतलो अशी म्हायती एएनसीक मेळल्ली. पुलिसांच्या पंगडान फाटल्या शेनवारा दनपारां 3.45 तें सांजे 7.15 मजगतीं टेळणी सुरू केली. एक नायजेरियन संबंदीत सुवातेर फिरता तें पळोवन पुलिसांक दुबाव आयलो. ताणी चवकशी केली तेन्ना तो ड्रग पेडलर आशिल्ल्याचे सिद्ध जालें. ताची झडटी घेतली तेन्ना घुंवळी वखदां सांपडली. उपनिरीक्षक प्रियांक गारुडीन ताचे आड गुन्यांव नोंद केलो. म्हापशें न्यायालयान ताका 6 दिसांची पुलीस कायद दिल्या.
अनारमेम हाचे आड व्हो चवथो आनी ड्रग्ज तस्करींतलो पयलो गुन्यांव आसा. 1 नोव्हेंबर 2013दिसा पर्वरी नायजेरियन नागरिकांनी राष्ट्रीय म्हामार्ग आडावन राडा केल्लो. तातूंत ताचो आसपाव आशिल्लो. ताका म्हापशेंच्या डिटेनशन केंद्रांत दवरल्लो. थंय ताणे एका कर्मचाऱ्याक मारपेट केल्ली. मजगतीं एएऩसीन फाटल्या दोन म्हयन्यांत चार गुन्यांव नोंद करून 1.58 कोटी रुपया मोलाची घुंवळी वखदां जप्त केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
