भांगरभूंय | प्रतिनिधी
म्हापशेंः हडफडें आनी हणजूणांच्या घर फोडी प्रकरणांत आरोपी मदिरीकरी विक्की उर्फ शेख समीर (रा. अनंथपूर, आंध्रप्रदेश) हाका दोशी थारावन म्हापशें पयल्या वर्ग न्यायालयान स म्हयने बंदखणीची ख्यास्त फर्मायल्या. आरोपी मदिरीकरी विक्की हो संवयीचो गुन्यांवकार आसून ताचेर आंध्र प्रदेशांत 1 कोटी रुपयांच्या भांगरा वस्तूंच्या चोरी सयत पांच गुन्यांवकारी गुन्यांव नोंद आसात.
हे संबंदी निवाडो न्यायाधीश ज्यूड सिक्वेरा आनी न्यायाधीश अक्षता काळे हांणी दिला. न्यायालयांत सरकारी पक्षा वतीन सरकारी वकील पी. फडते आनी टी. चोडणकार हांणी आनी दुबाविता वतीन एम. पवार हांणी युक्तीवाद केलो. पुलिसांनी ह्या प्रकरणाची चवकशी करून आरोपपत्र न्यायालयांत सादर केल्लें.
ह्यो दोनूय चोरी जून 2025 वर्सा जाल्ल्यो. पयली चोरी 17 जून दिसा सकाळीं 7 ते 8 वरां मजगतीं हडफडेच्या मायनात भाटी हांगा जाल्ली. कागाळदार ब्रेंडन माथायस हांच्या घरांतलीं जनेलाची ग्रील्स काडून एका अनवळखी चोरान एक लाख रुपया मोलाची मॅकबुक तशेंच मर्सडीस आनी बलेनो गाडयेचीं चावीं चोरून व्हेलीं.
दुसरी चोरीची घडणूक 22 जून दिसा सकाळीं सुमार 3.15 वरांचेर जाल्ली. अनवळखी चोरांनी हणजूणांतल्या चार्वी रिमिझ अपार्टमेंटांतल्या फ्लॅटाचें स्लायडिंग दार उगडून दोन मोबायल फोन, एक एअरपॉड आनी 1 हजार रुपया अशें मेळून 95 हजारांचो म्हाल चोरिल्लो. ह्या प्रकरणांत रौशन रंजन (बिहार) ह्या पर्यटकान पुलिशेंत कागाळ केल्ली. ह्या दोनूय चोरींत हणजूण पुलिसांनी भारतीय दंड संहितेच्या कलम 305 खाला घरफोडीचो गुन्यांव नोंद केल्लो.
पुलिसांच्या चवकशेंत मदिरीकरी विक्की उर्फ शेख समीर ह्या चोरयां कडेन संबंदीत आशिल्ल्याचें स्पश्ट जालां. पूण आरोपी आपल्या मूळ गांवांत पळून गेल्ल्याचें कळटकच ताका आंध्र प्रदेश पुलिसांनी अटक केली. अनंतपूर टाउन पुलिसांनी आपल्या गुन्यांवांत मदिरीकरी हाका अटक केल्या उपरांत हस्तांतरण जाले उपरांत हणजूण पुलिसांनी ताका अटक केली.
हणजूणाच्या चार्वी रिमिझ अपार्टमेंटांत चोरयेंतल्या दुबाविताचो वांगडी मंचिनेणी संतोष कुमार (रा. अनंथपूर, आंध्रप्रदेश) हाकाय पुलिसांनी अटक केल्या. जामीनाचेर सुटका जाले उपरांत दुबावीत फरारी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
