भांगरभूंय | प्रतिनिधी
पंचायतीच्या घाणयारें उदक व्हरपी टँकराक मनाय करपाचो प्रकार
भांगरभूंय । प्रतिनिधी
म्हापशें : बागा- कळंगूटे घाणयारें उदक प्रक्रिया प्रकल्पांत घाणयारें उदक व्हरपी ट्रकाक घेवपाक मनाय तशेंच सिवरेज म्हामंडळाच्या अधिकाऱ्यां कडल्यान पंचायत कामगारांक धमकी दिवपाच्या प्रकारा आड हडफडें नागवांतल्या लोकांनी प्रकल्पाचेर मोर्चो व्हरून जाब विचारलो.
सोमारा सांजे वेळार सरपंच रोशन रेडकार हांच्या फुडारपणा खाला ह्या मोर्चांत उपसरपंच सुषमा नागवेंकार आनी पंचायत वांगडी तशेंच लोकांनी व्हड संख्येन वांटो घेतिल्लो. कळंगूट पुलीस निरिक्षक परेश नायक हांच्या फुडारपणा खाला पुलीस फौजफांट्यान मोर्चो हाडिल्ल्या लोकांक प्रवेशदाराचेर आडायले.
फाटल्या दोन म्हयन्यां सावन आमकां ह्या घाणयारें उदक प्रक्रिया प्रकल्पांत (एसटीपी) त्रास सोंसचो पडटा. दोन दिसा आदींच प्रकल्पाच्या अधिकाऱ्यांनी आमचे घाणयारे उदक व्हरपी टँकर प्रकल्पांत घेवपाक सहमती दाखयल्ली. आमी सिवरेज म्हामंडळाक शुल्क भरले आनी तीन टँकर एसटीपींत रितें केले, पूण सोमारा आमचो टँकर घेवपाक न्हयकार दिलो. चवकशी करपाक गेल्ल्या आमच्या कामगाराक म्हामंडळाच्या अधिकाऱ्यांनी टँकर घेवचे ना, तुमका जाय तें करात अशी धमकी दिली, असो आरोप ह्या वेळार सरपंच रेडकार हांणी केलो.
एसटीपी वेवस्थापनान दावो केला, टँकर घेवंक ना ताचें कारण तातूंतल्यान घाणयारें उदक नेमा प्रमाण हाडूंक नाशिल्लें. टँकराचेर हडफडें- नागवा पंचायत अशें बरयिल्लें, मात तें पंचायतीचेच आसात हाची तांकां खात्री नाशिल्ली.
सिवरेज म्हामंडळाचे सहाय्यक अभियंते पाटील आनी एसटीपी अधिकाऱ्यां कडेन चर्चा केले उपरांत तणावाची परिस्थिती निवळ्ळी आनी पंचायतीचो टँकर प्रकल्पांत वचपाची परवानगी दिली.
सरपंच रेडकार आनी पंच वांगड्यांनी दावो केला, भोंवतणच्या गांवांतलें घाणयारें उदक एसटीपींत हाडटात. जाल्यार फक्त हडफडें- नागवाच्याच टँकरांक मनाय कित्याक? हो प्रकार योग्य ना. अधिकाऱ्यांची ही दादागिरी हाचे मुखार सोंसून घेवचे नात, अशीय तांणी शिटकावणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
