भांगरभूंय | प्रतिनिधी
हणजूण पुलिसांनी चवकशे खातीर घेतिल्लो ताब्यांत
म्हापशें: हडफड्यां बर्च बाय रेमियो लेन ह्या नाट्य क्लबांतल्या अग्नीकोंड प्रकरणांत हणजूण पुलिसांनी हडफडें-नागवाचे सरपंच रोशन रेडकार हांकां ताब्यांत घेतलो. पुलिसांचे हे कृतीचो निशेध करून रेडकार समर्थकांनी पुलीस स्टेशनाक रेवाडो घाले उपरांत तांची पांच वरांनी सुटका केली.
काल (आयतारा) दनपारां पुलीस निरिक्षक सुरज गांवस हांणी सरपंच रोशन रेडकार हांकां बर्च बाय रोमियो लेन क्लब दुर्घटने विशींचे चवकशे खातीर हणजूण पुलीस स्टेशनार आपोवन हाडलो. आपल्याक ह्या प्रकरणांत पुलीस गरजे भायर अटक करतले हे खातीर सगल्यांनी पुलीस स्टेशनार येवचें अशें आवाहन रोशन रेडकार हांणी मोबायलाचेर संदेश धाडटकच हडफडें-नागवा, हणजूण-कायसूव आनी कळंगूट सावन सुमार 500 परस चड रेडकार समर्थक पुलीस स्टेशना भायर जमा जाले.
जमाव आक्रमक जावन पुलीस स्टेशनाक तांणी रेवाडो घालून अधिकाऱ्यांक जाप विचारली. पूण पुलिसां कडेन जमावाच्या प्रस्नांच्यो जापो नाशिल्ल्यो. सरपंचाक बळीचो बोकडो करीत आसात. जी घडणूक नायट क्लबांत घडली, ताका जापसालदार संबंदीत गोंया भायले धनी आसात. पुलीस चोरांक सोडून, संन्यासाक फांशी दिवपा सारके वागतात असो आरोप जमावान केलो. जमावाचो रुद्रवतार पळोवन रेडकार हांकां उपरांत सोडून दिलो.
सरपंच रोशन रोडकार हांणी प्रतिक्रिया दितना सांगलें, पुलीस निरिक्षकांनी आपयिल्ल्यान हांव पुलीस स्टेशनार हजर जालों. पुलिसांक हांव सहकार्य करतालों. म्हाका हेतुपुरस्सर त्रास दीत आसात अशेंच दिसता. संबंदीत नायट क्लब मोडपा खातीर हांवेंच आदेश दिल्लो. पूण पंचायत संचालनालयान ताका स्थगिती दिली. पंचायत मंडळाच्या थारावा उपरांतूच वेपार परवाने दितात. 2022 सावन हांवें पंचायत मंडळाचो निर्णय आनी थारावा विशीं कसलेच परवाने दिल्ले नात अशें तांणी स्पश्ट केलें.
गांवांतले पांच डान्सबार हांवें बंद केले. हो क्लब परतून सुरू करपा खातीर म्हाका लाखांनी रुपयांची लांच दिवपाचो यत्न सरू जालो. पूण हांवें तो स्विकरलो ना असो दावो रेडकार हांणी केलो.
आम आदमी पक्षाचे फुडारी अमीत पालेकार हांणी म्हणलें, पांयतीन ह्या क्लबाक स्टॉप ऑर्डर काडिल्ली. कारण, बेकायदो रितीन हो क्लब सुरू आशिल्लो. पूण सीआरझॅड, भलायकी, अबकारी, वीज, एफडीए ह्या सारक्या सरकारी यंत्रणांनी हो क्लब सुरू दवरपाक परवानगी दिली. हातूंतल्यान सरकाराचो हाचे फाटल्यान छुपो अजेंडा आशिल्ल्याचें दिसून येता असो आरोप तांणी केलो.
हांव भिवपाचो ना. हांव आयज ह्या खिणाक भाजपाच्या वांगडीपदाचो राजिनामो दितां. लोकांनीय भाजपाक मतां दिवची न्हय. तशेंच कळंगूट मतदारसंघांतल्यान येता ते 2027चे विधानसभा वेंचणुकेंत भाजपाचो उमेदवार जिखचो ना, हाची काळजी घेतलों अशी प्रतिज्ञा सरपंच रोशन रेडकार हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
