भांगरभूंय | प्रतिनिधी
बर्च दंडाधिकारी अहवाला उपरांत सरकाराची कारवाय
पणजी: बर्च बाय रोमियो लेन उज्या प्रकरणांत दंडधिकारी अहवालांत दोशी आशिल्याचो ठपको दवरले उपरांत हडफडें पंचायतीचे सरपंच रोशन रेडकार हांका पंचायत संचालकांनी अपात्र थारावपाची कारवाय केल्या. तांचे पंचायत वांगडीपद लेगीत रद्द केलां. तशेच तेन्नाचे पंचायत सचीव रघुवीर बागकार हांकां सेवेंतल्यान बडतर्फ केलां. बर्च दुर्घटणे उपरांत तेन्नाचे सचीव रघुवीर बागकार हांकां निलंबीत केल्ले. आतां तांचेर बडतर्फीची कारवाय जाल्या.
बर्च बाय रोमियो लेन क्लबाक उजो लागून 25 जाणांक मरण आयिल्लें. गुन्याव नोंद करपा सयत सरकारान अंकीत यादव हांच्या फुडारपणा खाला दंडाधिकारी चवकशी समिती स्थापन केल्ली. हे समितीन चवकशी करून अहवाल सादर केला. ह्या अहवालाचेर बसका घेवन मुख्यमंत्री डॉ. प्रमोद सावंत हांणी कारवायेचे निदेश दिल्यात. हे प्रमाण आतां कारवाय सुरू जाल्या.
बर्च बाय रोमियो क्लबाचो वेपारी परवान्याचो कालावधी सोंपले उपरांत लेगीत पंचायतीन क्लब सील करपाची कारवाय करूंक ना. तशेंच हेर खात्यांकूय सुचोवणी दिवंक ना. चवकशी वेळार सरपंच रोशन रेडकार हांणी हाची कबुली दिली. तशेंच वीज तशेंच उदका पुरवणे खातीर लेगीत एनओसी दिली. चवकशी समितीच्या अहवालांत असो निश्कर्श काडले उपरांत पंचायत संचालकांनी सरपंच रोशन रेडकार हांकां पंचायत राज कायद्याचे तजविजे खाला सरपंच म्हूण अपात्र थारायल्यात. तांचे वांगडीपद लेगीत रद्द जालां. हाका लागून ते आतां पंच लेगीत आसचे नात.
तशेच निलंबीत केल्ले पंचायत सचीव रघुवीर बागकार हांकां बडतर्फ केल्यात. बर्चच्या वेपारी परवान्याची मुजत सोंपले उपरांत लेगीत क्लब सील केलो ना. तशेंच हेर खात्यांक कळयलें ना, हाची कबुली ताणें दिली. हाका अणसरून पंचायत संचालकांनी तांचे बडतर्फीचो आदेश जारी केलो.
प्रदुशण नियंत्रण मंडळाचे दोन अधिकारी निलंबीत
बर्च बाय रोमियो क्लबाची सारकी पळोवणी करिनासतना प्रमाणपत्रा दिवपाच्या प्रकरणांत मंडळाचे वैज्ञानीक सहाय्यक चैतन्य साळगांवकार आनी कनिश्ठ पर्यावरण अभियंते विजय कानसेकार हांकां निलंबीत केल्यात. बर्च बाय रोमियो लेन प्रकरणांत चवकशी समितीन अहवाल दिले उपरांत ही कारवाय मंडळान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
