भांगरभूंय | प्रतिनिधी
अमीत पालेकारः पुरावे आशिल्ल्याचो दावो
भांगरभूंय | प्रतिनिधी
पणजीः गोंयांतल्यो हडप केल्ल्या जमनींची राज्य सरकारान चवकशी करपा खातीर एसआयटी स्थापन केल्ली. पूण सध्या अशी हडप केल्ली जमीन विकपाचें काम एक मंत्री करता. भाजपाच्या कांय आमदारांनी आसगांवां अशो मालमत्ता विकत घेतल्यात, असो गंभीर आरोप आप गोंय प्रदेशाध्यक्ष अमीत पालेकार हांणी केला. बिरेस्तारा पणजे जाल्ले पत्रकार परिशदेंत ते उलयताले. ह्या वेळार वाल्मिकी नायक आनी जेर्सन गोम्स हाजीर आशिल्ले.
जमनी हडप प्रकरणां विशीं एसआयटीन आपलो अहवाल सादर केला तरी तो सामान्य लोकांक मेळूंक ना. आमकां मेळिल्ले म्हायती प्रमाण हडप केल्ली जमीन विकपाचें काम एक मंत्री करता. भाजपाचे हेर आमदार जमीन विकतीं घेवप वा विकप असलीं कामां करतात. हाचे पुरावे आमचे कडेन आसात. वेळ येतकच तें आमी जाहीर करतले, अशें पालेकार हांणी सांगलें.
पालेकार हांणी सांगलें, जमनी हडप प्रकरणांत चार ते पांच मुखेल आरोपींक अटक केल्या. हाचे उपरांत जमनी विकपाचें काम सुरु जाल्ल्याचें आमकां कळ्ळें. ज्यांच्यो जमनीं हडप जाल्यो तांकां एसआयटीक लागून न्याय मेळटलो अशी अपेक्षा आशिल्ली. पूण हांगा उरफाटें घडटा. एसआयटीच्या नांवान कांय जमनींच्या धनयां कडल्यान पयशे वसूल करतात. जांकां वारस ना तांच्यो जमनी सरकाराक कित्याक जाय हाची जाप दिवची. कालूच सोंपिल्ल्या विधानसभा अधिवेशनांत सरकारान वेगवेगळीं विधेयकां हाडून गोंयांक रियल इस्टेट लॉबीक विकपाचो यत्न केला. आयपीबी वा हेर विधेयकांक लागून सामान्य गोंयकारांक कसलोच फायदो जावचो ना. अधिवेशनांत 7 विरोधी आमदार 33 सत्ताधारी आमदारांक पावून उरले. ह्या वेळार सरकारी विधेयक फाटीं घेवपाचो वा समिती कडेन धाडपाचो विक्रम जालो आसतलो, अशें पालेकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
