भांगरभूंय | प्रतिनिधी
दुबय, खबरां संस्था: सावदी अरेबियांत हज यात्रे खातीर मक्का आनी मदिनाक येवपी यात्रेकरूंक उश्णतायेचो बरोच त्रास जाला. आतां मेरेन हज करतना १०८१ जाणांक मरण आयलां. साउदी अरेबियाच्या सरकारी टीव्हीन, मक्काच्या ग्रॅण्ड मशिदींतलें तापमान ५२ डिग्री सेल्सियस मेरेन पावलें अशें सांगलां. मरण आयिल्ल्या यात्रेकरुं मदीं इराण, भारत, इंडोनेशिया, इजिप्त आनी ट्युनिशियाचे नागरीक आसात.
पाकिस्तानाच्या हज मिशनाचे महासंचालक अब्दुल वहाब सूमरो हांणी १८ जून मेरेन वट्ट ३५ पाकिस्तानी नागरिकांक मरण आयिल्ल्याची म्हायती दिल्या. मक्काच्या ग्रॅण्ड मशिदींत तापमान वाडलां. लागसारच्या पवित्र थळांचेर तापमान ४७ अंश सेल्सियस मेरेन पावलां. सैतानाक प्रतिकात्मक फातर मारपाचो यत्न करतना कांय जाण बेशुद्ध पडले अशेंय तांणी सांगलें.
इजिप्ताचे ६००, इंडोनेशियाचे १४४, भारताचे ६८ आनी जॉर्डनाचे ६० जाण गर्मेन मेल्यात. जाल्यार १४०० लोक आजूनय बेपत्ता आसात, अशी म्हायती मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
