भांगरभूंय | प्रतिनिधी
-म्हाविद्यालयान पुरवणी परिक्षा दिवपाची वेवस्था करचीः एनएसयूआयची मागणी
म्हापशेंः आसगांवच्या डीएमसी म्हाविद्यालयांतल्या पयल्या वर्सांतल्या 88 विद्यार्थ्यांक विद्यापिठाच्या नेमा प्रमाण 75 टक्के हजेरी नाशिल्ल्यान परिक्षेक बसपाची परवानगी दिवंक ना. ह्या विद्यार्थ्यांचे शैक्षणीक वर्स फुकट जावचे न्हय म्हूण म्हाविद्यालयान तांकां पुरवणी परिक्षा दिवपाची वेवस्था करची, अशी मागणी एनएसयूआय ह्या विद्यार्थी संघटणेन केल्या.
बिरेस्तारा 18 वेर ह्या विद्यार्थ्यां सयत तांच्या पालकांनी एनएसयूआय, अभाविप ह्या विद्यार्थी संघटणांच्या पदाधिकाऱ्या सयत प्राचार्य डॉ. दिलीप आरोलकार हांची भेट घेतली आनी आपली समस्या तांचे मुखार मांडली. विद्यार्थ्यांचे वर्स फुकट वच्चे न्हय, म्हूण प्राचार्य ह्या नात्यान सहानुतीभूर्वक आनी विद्यार्थ्यांच्या फुडाराचो विचार करून थाकाय दिवची, अशी विनवणी पालकांनी डॉ. आरोलकार हांचे कडेन केल्या. बिरेस्तारा 18 वेर परिक्षेचो तिसरो पेपर आशिल्लो.
गोंय विद्यापिठाच्या नेमा प्रमाण, वर्गांत 75 टक्के हजेरी सक्तीची आसा, गैरहजर रावल्यार ते विशीं सभावीक स्पश्टीकरण वा दुयेंत आसल्यार वैजकी प्रमाणपत्र दिवप गरजेचें आसता. ते उपरांत विचार करून विद्यार्थ्याक सवलत मेळटा. ज्या विद्यार्थ्यांची हजेरी उणी आशिल्ली, तांचे कडेन वेळावेळार संपर्क करून हे विशीं म्हायती दिल्ली. तशेंच पालकांकूय हाची जाणीव दिवपाची सुचोवणी केल्ली. तरी लेगी कांय विद्यार्थ्यांनी ताचे कडेन आडनदर केली, अशें स्पश्टीकरण प्राचार्य आरोलकार हांणी दिले.
ज्या विद्यार्थ्यांची हजेरी उणी आसा, तांकां तांचे गैरहजर रावपाचे कारण दिवपाक सांगलां. ते विद्यापिठा कडेन धाडून निमाणो निर्णय विद्यापिठूच घेतले. पयल्या वर्सांतल्या एफवाय बीए, एफवाय बीएससी, एफवाय बी.कॉम, एफवाय बीसीए, एफवाय बीबीए ह्या फांट्यांतल्या 88 विद्यार्थ्यांक सत्रपरिक्षा दिवपाक मेळूंक ना.
————————
प्रशासकीय घाळपणाचो विद्यार्थ्यांक त्रास
प्रशासकीय अाडनदरेक लागून विद्यार्थ्यांचेर ही वेळ आयल्या. परिक्षा 15 एप्रील पसून सुर जाल्यात. शेनवार 13 तारखेक जांची उणी हजेरी आसा, तांचे आसन क्रमांक जाहीर करून तांकां परिक्षएक बसपाक परवानगी मेळना, अशी नोटीस जारी केल्ली. ताका लागून विद्यार्थ्यांक गरजेची कृती वा स्पश्टीकरण दिवपाक वेळ मेळूंक ना, अशें एनएसयूअायचे नौशाद चौधरी हांणी सांगलें.
—————
नेमा प्रमाण 75 टक्के हजेरी सक्तीची
गोंय विद्यापिठाच्या नेमा प्रमाण, वर्गांत 75 टक्के हजेरी सक्तीची आसा, गैरहजर रावल्यार ते विशीं सभावीक स्पश्टीकरण वा दुयेंत आसल्यार वैजकी प्रमाणपत्र दिवप गरजेचें आसता. ते उपरांत विचार करून विद्यार्थ्याक सवलत मेळटा. ज्या विद्यार्थ्यांची हजेरी उणी आशिल्ली, तांचे कडेन वेळावेळार संपर्क करून हे विशीं म्हायती दिल्ली. तशेंच पालकांकूय हाची जाणीव दिवपाची सुचोवणी केल्ली. तरी लेगी कांय विद्यार्थ्यांनी ताचे कडेन आडनदर केली, अशें स्पश्टीकरण प्राचार्य आरोलकार हांणी दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
