भांगरभूंय | प्रतिनिधी
भांगरभूंय । प्रतिनिधी
दिवचलः हरवळें गांव आनी आमी गांवकार एकठांय आसात. रुद्रेश्वर देवळांत आमकां आशिल्लो अधिकार कोणूय काडून घेवपाक शकनात. आमी आमच्या हक्का खातीर रुद्रेश्वराच्या आशिर्वादान स्वबळग्यार झुजतात. आमका राजकी आशिर्वाद ना अशें वरचें हरवळें हांगच्या सातेरकार गटा वतीन एके पत्रकार परिशदेंत स्पश्ट केलें. ह्या प्रकरणांत बेश्ठींच राजकीय फुडाऱ्यांचीं नांवा घेवचीं न्हय. आमी ओगी रावचे नात अशी शिटकावणी तांणी दिल्या.
सातेरकार गटा वतीन घेतिल्ले हे पत्रकार परिशदेत गांवांतले लोक व्हडा संख्येन हाजीर आशिल्ले. हरवळेंत जावपी रुद्रेश्वराच्या पालखे वेळार आमच्या गांवांतले धा पंदरा जाण वतात. मात आयतारा जाल्ले पालखेक हजारांच्या संख्येन हाजीर रावपाचें आवाहन भंडारी समाज फुडाऱ्यांनी केल्लें. ताका लागून धा पंदरा जाण पालखेक गेल्यार कसल्याय कारणाक लागून तांचेर हल्लो केल्यार कितें करतले, हे भिरातेंत आमी चड संख्येन गांवचे पालखेक गेल्ले अशें सातेरी देवस्थान समितीचो अध्यक्ष गितेश मळीक हाणे सांगलें.
पालखी मिरवणूक सुरू जातगीर आमचे लोक परंपरे प्रमाण पालखे फाटल्यान वतान. आयतारा ते तशे चलत वतना रुद्रेश्वर देवस्थान समितीं मदींच कितें तरी जालें आनी ताचें खापर आमचेर फोडून समितीन ह्या प्रकरणांचो दोश आमकां दिलो. हरवळें गांव व्हो मळीक घराब्यांचो आसा. ताका लागून आमच्या न्याय हक्का खातीर आमी झूजतले. हक्कां खातीर न्यायालयांत लेगीत वचपाची आमची तयारी आसा अशें ताणे सांगलें
सुवार्था खातीर भंडाऱ्यांचो वापर
सध्या वेंचणुकेचें वातावरण आशिल्ल्यान राजकी घडामोडी नेटांन चल्ल्यात. ह्याच राजकारणांत आपलो सुवार्थ सादपा खातीर रुद्रेश्वर देवस्थान समिती गोंयांतल्या भंडारी समाजांतल्या लोकांचो गैरवापर करता. त्या समाजांतल्या लोकांनी हें समजून घेवपाक जाय. आमी हिंदूनी देवस्थान आनी हेर कारणां खातीर एकमेकां कडेन झगडप समा न्हय. सुज्ञ लोकांनी हे समितीचो हेत लक्षांत घेवचो अशें आवाहन गितेश मळीक हाणे केलें.
हरवळ्यांतले सगले उत्सव आनी सण हाचे पयलीं कसलोय वाद वा तंट्या बगर जाताले. आतांच सणा मंदी वाद कित्याक जावपाक लागल्यात हाचो विचार करपाची गरज आसा. समितीचे पदाधिकारी आपली मनमानी करतात तातूंतल्यान हे वाद उप्रासपाक लागल्यात. समितीक आयजमेरेन चलंत आशिल्ली पंरपरा, भावचार राखून दवोरप जमलें ना. रुद्रेश्वर देवस्थानाची सध्यची विकृत समिती दिवचलच्या उपजिल्होधिकाऱ्यान बरखास्त करून अणभवी आनी ज्येश्ठ भंडारी समाजांतले व्यक्ती कडेन सूत्रां दिवची अशी मागणी दशरथ मळीक हाणे केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
