भांगरभूंय | प्रतिनिधी
काँग्रेसीचो पुलिसांचेर टिका, जेलभरो आंदोलनाची शिटकावणी
भांगरभूंय । प्रतिनिधी
पणजीः वेळसांव पंचायतीच्या काम बंद दवरपाच्या आदेशाचे उल्लंघन करुन रेल विकास निगम लिमिटेडान डबल ट्रेकींगाचे काम चालूच दवरलां. हे विशीं थळाव्यांनी पुलिसांक कागाळ केल्ली. पूण पुलीस अधिकारी आनी कंत्राटदाराक जापसालदार धरिनानासतना थळावे आनी सरपंचा आड एफआयआर दाखल केली. काँग्रेस हे कृतीचो निशेध करता आनी तांचे हक्कां खातीर काँग्रेस जेल भरो आंदोलन करतली, अशी शिटकावणी काँग्रेसीचे प्रदेशाध्यक्ष अमित पाटकार हांणी दिल्या.
पणजे काँग्रेस हावसांत घेतिल्ले पत्रकार परिशदेत अमित पाटकार उलयताले. ह्या वेळार पक्षाचे फुडारी ओरोविल दोरादो, ओलेन्सियो सिमोयस, वेळसाव सरपंच मारीया गोविया आनी जमीन धनी सॅन्ड्रा राॅड्रीग्स हाजीर आशिल्लें.
संविधान लोकांचे हक्क जपता. पूण वेळसाव डबल ट्रेकींग विशयावेल्यान भाजपान परत एक फावट संविधानात विश्वास दवरिना हे परत एक फावट दाखोवन दिला, असो आरोप पाटकार हांणी केलो.
वेळसांव पंचायतीन 29 जानेवारीक दक्षीण पश्चिम रेल्वेक काम बंद दवरपाची नोटीस काडिल्ली. पूण तांणी थळाव्यांचे मालमत्तेत अतिक्रमण करत काम सुरू केलें आनी आपल्या दारात मातयेचो भराव घालून वाट बंद केली अशी कागाळ जमीनीची धनी सेन्ड्रा हांणी पुलिशेंत दाखल केल्ली, अशें पाटकार हांणी सांगलें.
काय दिसांनी पुलिसांचो व्हडलो फौजफाटो आयलो. पूण दुर्दैवाची गजाल म्हणल्यार सरपंच, जमीन धनी आनी काँग्रेसीच्या पदाधिकाऱ्यांचेर एफआयआर नोंद करून कारवाय करता. पूण वैधानिक संस्था पंचायतीन दिल्ले आदेश अंमलात आसताना लेगीत पुलिसांनी आयपीसी 188 कलम खाला आरव्हीएनएल, दक्षीण पश्चिम रेल्वे आनी तांचे कंत्राटदाराचेर कसलीच कारवाय करूंक ना, असो आरोप पाटकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
