भांगरभूंय | प्रतिनिधी
म्हजें मत
बिराडाक कोण रावतो, तो खंयचो हाची पडटाळणी वा सत्यापन ही एक सक्तीची प्रक्रिया आशिल्ल्यान हणजूण पुलिसांनी पुलीस उपनिरिक्षक स्वप्नील नायक हांच्या मार्गदर्शना खाला तपासणी केली. बरें जालें. समाजाची सुरक्षीतताये खातीर ही तपासणी खूब म्हत्वाची. कारण गोंयांत बंडखोर, आतंकवादी, गुन्यांवकार, घुसखोर हाचे पयलीं सांपडल्यात. गोंयकार कसलीच चवकशी करीनासना बिनधास्त तांकां बिराडां दितात. बिराडाक रावपीय आपलो भाव, इश्ट अशें सांगून कांय म्हयने चवगांच्या जाग्यार पांच वा सात जाण रावतात.
बिराडकारांची म्हायती तपासपा खातीर पुलीस स्टेशनांत सादर करची पडटा. बिराडाच्या सत्यापन फॉर्माचें नुतनीकरण करपाचेर पुलीस उपनिरिक्षकान भर दिलो. तो फकत एक दीस रावता जाल्यार लेगीत ताचे कडल्यान वळखपत्रां घेवपाचो सल्लो स्वप्नील नायक हांणी दिलो. हातूंत आयडी कार्डा वांगडा ताचें, बिराड दिवपी धनयाचें नांव, पत्तो, आनी हेर गरजेची म्हायती सारकिल्या तपशीलांचो आस्पाव जाता. कुटुंबाचो फोटो काडून पुलीस स्टेशनांत सादर करपाक धनयांक पीएसआयन निर्देश दिला. फाॅर्मांत खरो पत्तो आसा आनी गुन्यांवकारी नोंदी नात वा खंयच्याय बेकायदेशीर कामांत आदींच घुस्पूंक ना हाची खात्री करपाक सत्यापन प्रक्रिया मदत करता.
बिराडकाराची म्हायती सादर करूंक ना जाल्यार धनयाक दंड भरचो पडूं येता. ही प्रक्रिया गुन्यांव आडावपाक, मालमत्तेच्या धनयाक संभाव्य धोक्या पसून राखण दिवपाक आनी समाजांतल्या दरेकल्या खातीर सुरक्षीत वातावरण तयार करपाक मदत करता.
खबरदारी म्हणून अचकीत तपासणी केल्ल्या खातीर पीएसआय नायक हांचे खूब उपकार. जम्मू- काश्मीरांतल्या पहलगामांत जाल्ल्या आतंकवादी हल्ल्या उपरांत हें सत्यापन जालां. दर स म्हयन्यांनी अशें जावंक जाय. पुलिसांक गुन्यांवकारांनी भियेवपाक जाय. शेवटाक कायदो महत्वाचो.
– राजेश बाणवलीकार
वेगासवाडो, हडफडे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
