भांगरभूंय | प्रतिनिधी
डेहराडून, खबरां संस्था: चीनच्या ताब्यांत आशिल्ल्या तिबेटच्या भागांत कैलास मानसरोवर यात्रेची तयारी सुरू जाल्या. २०१९ सावन ही यात्रा बंद आशिल्ली. यात्रे खातीर भारतीयांचो पयलो पंगड जूनाच्या पयल्या सप्तकांत वचपाक शकता. चीना कडेन यात्रे विशीं सहमती जातांच परराष्ट्र मंत्रालय आनी उत्तराखंड सरकार हांचे मदीं पयली बसका जाली. सरकारी सुत्रां प्रमाण, हे यात्रेंत जायते बदल दिसतले. नवी दिल्लींच्यान भायर सरले उपरांत यात्रेकार ३३० किमी पयस टनकपूर हांगा रावतले. आदीं हलदवानीत आशिल्लो. दुसरो मुक्काम नवी दिल्ली ते लिपुलेख मेरेन गाडयेन प्रवास आसतलो. लिपुलेखचे दुसरे वटेन चीन सीमा सुरू जाता. थंय सपाट सुवात आशिल्ल्यान दोन पदरी रस्तो जाला. थंयच्यान बसीन यात्रेकरू कैलासाक वतले.
पिथोरागडचे पर्यटन अधिकारी किर्तिराज आर्य हांणी सागलें, यात्रेची तयारी सुरू जाल्या. ह्या वेळार धारचुला ते तवाघाट जावन लिपुलेखच्या आदीं ३० किमी वयर गुंजी गांवांत पावपाक मेळटलें. आदीं आठ दीस लागताले. म्हणल्यार दिल्लीच्यान चवथ्या आनी पांचव्या दिसा तुमी कैलास क्षेत्रांत आसतले. इतलोच वेळ परतीच्या प्रवासा खातीर लागतलो. आदीं २४ दिसांची आशिल्ली ही यात्रा आतां १० दिवसांतूच पुराय जातली.
लिपुलेखच्या मार्गाचो उल्लेख स्कंद पुराणांत
भारतांतल्यान कैलास यात्रे खातीर तीन मार्ग आसात. पयलो सिक्किमच्या नाथुलाच्यान ८०२ किमीचो व्हडलो मार्ग. दुसरो, लिपुलेख हांगच्यान कैलास फकत ६५ किमी आसा. तिसरो-नेपाळ मार्ग जो काठमांडूच्यान ४०० किमी पयस आसा. स्कंद पुराणांतल्या मानस खंडांत कूर्मांचल पर्वाच्या ११ व्या अध्यायात लिपुलेखचो उल्लेख आसा. कैलास मार्ग उत्तराखंडच्या शारदा वा काली न्हंयेच्या दयारदेगेवेल्यान वता, अशें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
