भांगरभूंय | प्रतिनिधी
भांगरभूंय । प्रतिनिधी
पणजीः फाटल्या स वर्सांत 60 मुळाव्यो सरकारी शाळा बंद पडल्यात जाल्यार 18 शाळा विलीन केल्यात. जाल्यार ह्या काळा मजगती सरकारान वट्ट 19 बिगर सरकारी मुळावे शाळांक परवानगी दिल्या. तातूंत 52 टक्के ह्यो खाजगी मुळावी शाळांचो आस्पाव आसा, अशी लेखी जाप मुख्यमंत्री डॉ. प्रमोद सावंत हांणी दिल्या.
विधानसभेच्या पटलार केपेंचे आमदार एल्टन डिकोस्ता हांचे प्रश्नाक मुख्यमंत्री तशेंच शिक्षण मंत्री डॉ. प्रमोद सावंत हांणी लेखी जापेंत म्हायती दितना सांगले, वर्स 2020-21 ते 2025-26 मजगतीं एकूय विद्यार्थी नाशिल्ले कारणान 60 मुळाव्यो शाळा बंद पडल्यात जाल्यार 18 शाळांनी सरासरी फक्त 2 ते 3 विद्यार्थी आशिल्ले कारणान त्यो विलिन जाल्यात.
सगळ्यांत चड 11 शाळा वर्स 2020-21त बंद पडल्यात जाल्यार अंदूंचे वर्स 2025-26त 8 मुळाव्यो शाळा बंद पडल्यात. दिवचल म्हालांत 11 शाळा बंद पडल्यात, फोंडें म्हालांत 7, काणकोणां 10 शाळा बंद पडल्यात.
मजगतीं वर्स 2020-21त आठ शाळांनी 21 भुरगीं, 2021-22त तीन शाळांनी 7 भुरगीं, 2022-23त दोन शाळेंत पांच भुरगी. 2023-24त चार शाळांनी 12 भुरगी आनी 2025-26त एका शाळेत 3 भुरगी आशिल्ले कारणान ह्यो शाळा विलिन जाल्यात. वर्स 2024-25त एकूय शाळा विलीन जावंक ना.
ह्या काळा मजगती सरकारन नव्या 19 मुळाव्या शाळांक परवानगी दिल्या. तातूंतल्यो 9 शाळा ह्यो सरकारी अनुदानीत आसात जाल्यार 10 शाळा खाजगी आसात. सगळ्यांत चड 7 शाळांक फोंडें म्हालांत परवानगी दिल्या. दिवचल आनी बार्देस म्हालांत दरेकी 5, साश्ट म्हालांत 4, सत्तरी म्हालांत 2 आनी धारबांदोडें, केपें, मुरगांव, सांगें आनी पेडणें दरेकी 1 शाळांक परवानगी दिला.
वर्स बंद पडिल्ल्यो शाळा विलीन जाल्ल्यो शाळा
2020-21 – 12 8
2021-22 – 8 3
2022-23 – 11 2
2023-24 – 14 4
2024-25 – 7 0
2025-26 – 8 1
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
