भांगरभूंय | प्रतिनिधी
कोलकाता, खबरां संस्था : लोकसभा वेंचणुकेचो प्रचार निमण्या पांवड्यार पावला. १ जूनाक उत्तर प्रदेश, बिहार, अस्तंत बंगाला सयत हेर आठ राज्यांनी वट्ट ५७ मतदारसंघांनी मतदान जातलें. हाका लागून प्रधानमंत्री नरेंद्र मोदी हांणी ह्या मतदारसंघांचेर लक्ष केंद्रीत केलां. मजगतीं, बुधवार (२९ मे) अस्तंत बंगालांतल्या दक्षीण २४ परगना मतदारसंघांत भाजपा उमेदवारा खातीर आयोजीत केल्ले प्रचार बसकेंत मोदी हांणी भाशण केलें. ह्या वेळार तांणी म्हणलें, अंदूं बंगालांत भाजपाक व्हड जैत मेळटलें. फाटल्या वेंचणुके परस भाजपाक अंदूं बंगालांत चड सुवातांचेर जैत मेळटलें.
हे प्रचार रॅलींत मतदारांक मोदी हांणी सांगलें, ‘तुमच्या एका मतान देशाची दिका बदलूं येता. लोकसभा वेंचणुकेचो निकाल ४ जून दिसा भायर सरतलो आनी ताचे उपरांत स म्हयन्यां उपरांत देशांत व्हड राजकी भूंयकांप येतलो. वंशपरंपरा, घराणेशाहीचें राजकारण करून मुखार वचपी जायत्या पक्षांचो नाश जातलो.’
स म्हयन्यां उपरांत नेमके कितें जातलें हाचे विशीं मोदी हांणी कसलोच संकेत दिवंक ना. पूण बंगालांत तांणी हें भाशण केल्ल्यान तांचो रोख ममता बॅनर्जी हांच्या तृणमूल कॉंग्रेस पक्षा कडेन आसा, अशें म्हणटात. पूण कांय राजकी विश्लेशक ताचो वेगळो अर्थ काडटात.
दक्षीण २४ परगना जिल्ह्यांत जाल्ले प्रचार बसकेंत उलयतना नरेंद्र मोदी हांणी म्हणलें, तृणमूल कॉंग्रेसीन बंगालाक उदरगती पसून पयस दवरलां. लोकांकूय आतां कळून आयलां, देशाची प्रामाणीक पणान उदरगत करपी पक्ष फकत भारतीय जनता पक्ष म्हणून. देखून तुमी तुमच्या राज्यांत भाजपाक घटमूट करात, मागीर भाजपा तुमची दरेक अपेक्षा पुराय करतलें अशें हांव बंगालाच्या मतदारांक उतर दितां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
