भांगरभूंय | प्रतिनिधी
पणजी ः राज्यांतल्या मिठागरांचो सर्व्हे फुडल्या स म्हयन्यांत जैव विविधताय मंडळा वतीन करतले. तशेंच मीठगरांतल्यान तयार जावपी मीठ राज्यांतल्या उद्देगांक पुरवण करतले अशें आश्वासन मुख्यमंत्री डॉ. प्रमोद सावंत हांणी शुक्रारा विधानसभेंत दिलें.
आमदार विरेश बोरकार हांणी प्रस्न तासांत मिठागरांचो प्रस्न मांडलो. राज्यांतल्या वेगवेगळ्या वाठारांनी मिठागरां आसात. पूण तांची राखण आनी संवर्धन करपाक सरकाराक पुरायपणान अपेस आयलां. केंद्र वा राज्य सरकारांनी मिठगरां खातीर कसलीच येवजण चालीक लावंक ना. मीठ उत्पादकांक सरकार अर्थीक मजत दिना. ताचो परिणाम मिठागरांक जावपाक लागला अशें आमदार बोरकार हांणी सभाघरांत नदरेक हाडलें. हे विशीं उलयतना, जैव विविधताय मंडळ फुडल्या स म्हयन्यांत राज्यांतल्या सगळ्या मिठागरांचो सर्व्हे करतलें. इतलेंच न्हय तर तातूंतल्यान तयार जावपी मीठ उद्देगांक पुरवण करतले आनी मिठगरांक आदार दितले अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
