भांगरभूंय | प्रतिनिधी
पणजीः सेवा पखवाडा निमतान आयज 970 जाणांक नेमणूक पत्रां दिली. सध्या प्राथमीक शिक्षकांचीं 500 पदां कंत्राटी पद्दतीन भरल्यात. फुडल्या स म्हयन्यांत कर्मचारी भरती आयोगा वतीन हीं पदां कायम स्वरुपांत भरतले अशें मुख्यमंत्री डॉ. प्रमोद सावंत हांणी सांगलें. शुक्रारा पणजेंत जाल्ल्या कार्यावळींत ते उलयताले. ह्या वेळार उदका स्त्रोत मंत्री सुभाष शिरोडकार, मंत्री सुभाष फळदेसाय, खासदार सदानंद शेट तानावडे आनी हेर आमदार हाजीर आशिल्ले.
नेकर भरतींत पारदर्शकता हाडपा खातीर सरकारान गोंय लोकसेवा आयोग आनी कर्मचारी भरती आयोग स्थापन केला. आयज ज्या लोकांक कंत्राटी नेमणूक पत्रां मेळ्ळ्यांत तांकां फुडल्या कांय म्हयन्यांत कायमस्वरूपी नोकरी मेळटली. कर्मचारी भरती आयोग फुडल्या काळांत अडीच हजार पदां भरतले. फुडाराक सर्त परिक्षेक पर्याय ना हें लक्षांत दवरप म्हत्वाचें. तशेंच तरणाट्यांनी केंद्रीय लोकसेवा आयोग आनी बँक पदां खातीर यत्न करप गरजेचें आसा. हे खातीर कॉलेजीच्या पयल्या दिसा सावन तयारी सुरू करपाक जाय अशें मुख्यमंत्री डॉ. सावंत हांणा सांगलें.
गोंय मनीस बळ उदरगत म्हामंडळांत आयज 220 जाणांक नोकरी दिल्या. फुडल्या दोन वर्सांत म्हामंडळांत 5 हजार लोकांक नोकरी दिवपाचो आमी यत्न करतात. म्हामंडळाच्या कर्मचाऱ्यांक स्वाभिमानान जगपाची संद सरकारान दिल्या. तांकां हेर सरकारी कर्मचाऱ्यां प्रमाण सुटी आनी हेर सुविधा दिल्यांत. ह्या कर्मचाऱ्यांक फुडल्या शिक्षणा खातीरय म्हामंडळा कडल्यान मजत दितात.
लोकां खातीर काम करचें
आयज नेमिल्ल्या कर्मचाऱ्यांनी उमेदीन आनी आपुलकेन काम करपाक जाय. लोकांक मजत करपा खातीर आपूण काम करता हें तांणी लक्षांत दवरचें. कर्मचाऱ्यांनी योग्य पद्दतीन काम केल्यार ताचो फायदो लोकांक जातलो अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
