भांगरभूंय | प्रतिनिधी
पणजीः गोंय भलायकी खात्यांत व्हड प्रमाणांत भ्रश्टाचाराचे प्रकरण उक्ते जाले उपरांत भलायकी मंत्री विश्वजीत राणे अलर्ट मोडाचेर आसात. मजगतीं, स अधिकाऱ्यांक निलंबीत करपाची प्रक्रिया सुरु आसा अशी म्हायती भलायकी मंत्री विश्वजीत राणे हांणी दिल्या.
मेळिल्ले म्हायती प्रमाण, ह्या अधिकाऱ्यां मदीं दोन भलायकी निरिक्षक आनी चार नितळसाण निरिक्षक आसात. हे कर्मचारी भ्रश्टाचार आनी ब्लॅकमेलिंग सारक्या गंभीर प्रकरणांत आसात अशी म्हायती उजवाडाक आयले उपरांत खात्यान तांचे हालचालींचेर बारीक नदर दवरली. मजगतीं, काल भलायकी खात्याच्या अधिकाऱ्यांची बसका जाली. तातूंत हो प्रस्न उप्रासलो. खात्याच्या स अधिकाऱ्यां आड निलंबीत करपाची प्रक्रिया सुरू आसा आनी फुडल्या सप्तकांत ह्या अधिकाऱ्यांचीं नांवां जाहीर करतले अशें भलायकी मंत्री राणे हांणी सांगलें.
राज्याच्या प्रशासनांत पारदर्शकता हाडपा खातीर मुख्यमंत्री डॉ. प्रमोद सावंत, भलायकी मंत्री विश्वजीत राणे आनी हेर मंत्री वावुरतात. मजगतीं, खंयच्याच तरेचो भ्रश्टाचार सोंसचें नात. दोशी अधिकाऱ्यां आड खर कारवाय करतले अशें राणे हांणी सांगलें.
हे कारवायेक लागून खात्याच्या हेर कर्मचाऱ्यां मदीं बोवाळ जाला. फुडल्या कांय दिसांनी सरकार आनीक खर पावलां उबारपाची शक्यताय आसा. हाका लागून भलायकी खात्याचें काम चड पारदर्शक आनी बरें जातलें अशी अपेक्षा आसा.
मजगतीं, ह्या कर्मचाऱ्यांक निलंबीत करचे बदला, नोकरे वयल्यान काडून उडोवचे, अशी मागणी सोशल मिडियाचेर जावपाक लागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
