भांगरभूंय | प्रतिनिधी
ल्हान भुरग्यांच्या जिणेचे पयले कांय म्हयने तांच्या शारिरीक आनी मानसीक उदरगती खातीर सगळ्यांत म्हत्वाचे आसतात. ह्या वेळार तांकां योग्य पोशण मेळप खूब गरजेचें. स म्हयन्यां उपरांत जेन्ना भुरग्याक आवयच्या दुदा वांगडा भुरग्यांचे वाडी खातीर पुश्टीक आहार कसो मेळटलो हें थारावप खूब म्हत्वाचें. स ते धा म्हयन्यांच्या भुरग्यांची पचन संस्था ल्हवू ल्हवू अन्न पचोवन घेता, देखून योग्य आहार दिल्यार भुरग्यांक पोशण मेळटाच पूण तांची रोगप्रतिकार शक्त घट जाता आनी तांची भलायकी बरी उरता.
स ते धा म्हयन्यांच्या भुरग्याक पोशणाचें म्हत्व
हे पिरायेचेर भुरग्यांच्या कुडीक प्रथिनां, जीवनसत्वां, खनिजां आनी हेर पोशक तत्वांची गरज आसता. हाका लागून तांची शारिरीक उदरगत, मेंदवाची वाड आनी रोगप्रतिकार शक्त घट जाता. आवयचे दूद आजूनय भुरग्यांक पोशणाचो मुखेल स्त्रोत आसूंक जाय, पूण ताचे वांगडाच योग्य आहारुय भुरग्याचे एकंदरीत वाडी खातीर म्हत्वाचो आसता.
फळांचो रोस
स ते धा म्हयन्यांच्या भुरग्यांक फळांचो रोस दिवंक मेळटा. नासपती, केळी, पपय, आंबो अशा मोव फळांपसून तयार केल्लो रोस भुरग्यांक दिवचो. ह्या फळांत जीवनसत्वां आनी तंतू भरपूर आसतात. जे भुरग्यांच्या पचनशक्तीक आनी रोगप्रतिकार शक्तीकय फायदेशीर आसतात.
भाजीपाल्याचो सूप
भाजीपालो सूप हो भुरग्यां खातीरय एक बरो पर्याय. हे खातीर गाजर, रताळे, वाटाणे, भोपळो सारकिल्या भाजयांचो सूप तयार करून भुरग्यांक दिवंक शकतात. ह्यो भाजयो उकडून वा वाफ काडून मागीर मिक्सरांत मिक्स करून तांचो सूप तयार करचो. भाजयेंतल्यान भुरग्यांच्या आहारांत जीवनसत्व ए, सी आनी तंतू दिता.
मूग, मसुरीचें उदक
मूग आनी मसुरीचें उदकूय भुरग्यां खातीर खूब बरें मानतात. मसूर हो प्रथिनांचो बरो स्रोत. जाका लागून भुरग्यांची बरी वाड जाता. तशेंच दाळ बरी शिजोवन भुरग्यांक ताचें उदक पियेवंक दिवचें.
तांदूळ आनी मुगाचे दाळीची खिचडी
तांदूळ आनी मूग दाळ खिचडी हो उर्जा आनी प्रथिनाचो उत्कृश्ट स्त्रोत आसा. जाका लागून भुरगीं सक्रिय उरतात. ते खातीर तांदूळ आनी मुगाची दाळ एक सारक्याच प्रमाणांत घेवन तीं बरी शिजोवपाक दिवचीं. शिजयल्या उपरांत मिक्स करुन थोडें तूप घालून भुरग्यांक खावपाक दिवचें.
नासण्याचो शिरो
स ते धा म्हयन्यांच्या भुरग्यां खातीर नासण्याचो शिरो एक बरो पर्याय. नासण्याचे पिठ उदकांत वा दुदांत शिजोवन ताचो शिरो तयार करचो. नासण्यात लोखण आनी कॅल्शियम भरपूर आसता, ताका लागून हाडां घट जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
