स्वींडनाक मनयलो गोंय दीस
भांगरभूंय | प्रतिनिधी
भांगरभूंय । ग्रेटा मिनेझीस – जाॅन सुवारीस
स्वींडन ः लंडनांतल्या स्वींडन शारांत शेनवारा गोंय दीस हो गिमाळो महोत्सव मनयलो. हांगा 30 हजारां वयर गोंयकार रावतात. ते तशेंच ब्रिटनांत साबार कडेन रावपी गोंयकारांनी ह्या महोत्सवाक गर्दी केल्ली. फाटलीं दोन वर्सां कोरोनाक लागून तो जावंक नाशिल्लो. मात हे खेपे तातूंत उमेद आनी खोस दिसून आयली. पावसाची दडक आयली, पूण गोंयकारांचे उमेदीचेर तो उदक रकोवंक शकलोना.
ह्या महोत्सवांत गोंयची संस्कृतायेचें दर्शन घडोवपी साबार कार्यावळी जाल्यो. गोंयच्या खाणां, जेवणांची उपस्थितांनी रुच घेतली. कोंकणी संगीताचोय कार्यक्रम जालो. तातूंत नामनेच्या कलाकारांनी कोंकणी पदां सादर केलीं.
स्वींडनांतल्या गोंय संघटनेचे अध्यक्ष जिको फर्नांडीस हांणी गोंय दीस महोत्सवाची म्हायती दिली. कोंकणी मनशाचे संस्कृतायेचे यादी खातीर, तशेंच सगले गोंयकार एकठांय येवचे म्हूण तो आयोजीत केला, अशें तांणी सांगलें.
सगले गोंयकार ह्या दिसा निमतान एकठांय आयल्यात. दोन वर्सां उपरांत आमी हो दीस उमेदीन मनयतात, हाची म्हाका खोस जाता, अशें एलीस फाल्कांव हिणें सांगलें.
द. स्वींडनचे खासदार राॅबर्ट बकलॅण्ड हांणी ह्या सुवाळ्याक खास हाजिरी लायली. तांणी गोंयकारांक परबीं दिवन गोंयचें जेवण आवडलें अशें सांगलें. ह्या गिमाळ्या सुवाळ्यांत वांटेकार जातना म्हाका खूब खोस जाता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
