भांगरभूंय | प्रतिनिधी
बर्न, खबरां संस्था ः स्वित्झर्लंडांत आयच्यान बायलांक भौशीक सुवातींनी हिजाब, बुरखो वा हेर खंयच्याय मार्गान तोंड धांपपाचेर बंदी घाल्या. खबरां एजन्सी रॉयटर्साच्या म्हणण्या प्रमाण, ह्या कायद्याचें उल्लंघन केल्यार 1000 स्विस फ्रँक्स म्हणल्यार सुमार 96 हजार रुपया दंड घालतलें.
2021 वर्सा स्वित्झर्लंडांत जाल्ल्या जनमत कौलांत 51.21% नागरिकांनी बुरख्याचेर बंदी घालपाच्या वटेन मतदान केलें. ताचे उपरांत बुरख्याचेर बंदी घालपा संबंदी कायदो तयार केलो, जो आयज सावन 1 जानेवारी 2025 पसून लागू जाता.
स्वित्झर्लंड पयलीं बेल्जियम, फ्रांन्स, डेन्मार्क, ऑस्ट्रिया, नेदरलँड आनी बल्गेरिया ह्या देशांनीय हे संबंदी कायदे केल्यात. ह्या कायद्या उपरांत भौशीक कार्यालयां, भौशीक येरादारी, रेस्टॉरंट, दुकानां आदी भौशीक सुवातींनी बायलांक तोंड पुरायपणान धांपपाक मेळचें ना.
2022 वर्सा स्वित्झर्लंडाच्या संसदेच्या कनिश्ठ सभाघरांतल्या राश्ट्रीय परिशदेन मुखामळ धांवपाचेर बंदी घालपाच्या कायद्याचेर मतदान केलें. ह्या काळांत 151 वांगड्यांनी ताचे वटेन मतदान केलें आनी 29 वांगड्यांनी ताचे आड मतदान केलें. उपरांत हे संबंदी कायदो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
