भांगरभूंय | प्रतिनिधी
स्विडन पंगडान बायलांचे संवसारीक फुटबॉल सर्तींत तिसरे सुवाते खातीर जाल्ले मॅचींत येजमान ऑस्ट्रेलिया पंगडाक 2-0 असो हारयलो. मॅच हांगाच्या लॅंग पार्क मैदानाचेर जाली. ह्या जैता सयत स्विडनान चवथे खेपे कांश्या पदक जिखलें.
स्विडना वतीन 30व्या मिनटाक फ्रिडोलिना रोल्फोन पॅनल्टीचेर गोल केलो. जाल्यार 62व्या मिनटाक डिफॅण्डर कोसोवरे असलानीन गोल केलो. मजगतीं, आयज इंग्लंड आनी स्पेन ह्या पंगडां मदीं फायनल जातली.
ऑस्ट्रेलिया पंगडाक चवथे सुवातेर समाधान मानचें पडलें आसलें तरी सर्तीच्या इतिहासांतलें ताचें हें सर्वोत्कृश्ट प्रदर्शन आसा. ऑस्ट्रेलिया पंगडाक एकदाय क्वॉर्टरफायनलीचो पांवडो हुपपाक जमूंक नाशिल्लो.
28व्या मिनटाक ऑस्ट्रेलियेची डिफॅण्डर क्लेयर हंट हिणें स्विडनाची खेळगडी स्टिना ब्लॅकस्टेनियस हिका पॅनल्टी बॉक्सांत उडयली. रॅफ्रीन पॅनल्टी दिली. रॉल्फोन पॅनल्टीचेर गोल करपाक येस मेळयलें. 62व्या मिनटाक स्विडनाची स्ट्रायकर असलानी हिणें लॉंग रेंज शॉर्ट मारलो जो थेट ऑस्ट्रेलियेच्या गोल पोस्टांत गेलो.
मॅचीचेर चडसो वगत स्विडनान आपलो शेक दवरलो. 2003चो उपवस्ताद पंगड स्विडनान हाचे आदीं 1991त जर्मनींत, 2011त फ्रान्सांत आनी 2019त इंग्लंडांत कांश्या पदक जिखिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
