भांगरभूंय | प्रतिनिधी
नवी दिल्ली, खबरां संस्था ः स्विगीन आतां उदकाचेरूय फूड डिलीव्हरी सर्व्हिस सुरू केल्या. कंपनीन जम्मू- काश्मीरांतल्या श्रीनगरांतल्यान हाची सुरवात केल्या. श्रीनगरांतल्या दल तळ्याचेर आशिल्ल्या हाऊसबोटींक जेवण पावोवपा खातीर कंपनीन आपली सेवा वाडयल्या अशें स्विगीन सांगलें. कंपनीचे वितरण भागीदार ह्या तरंगपी हाऊसबोटीं मेरेन पावपा खातीर शारांतल्या नामनेच्या शिकारा बोटींचो वापर करतले.
शिकारा ऑपरेटरां वांगडा भागीदारी
पर्यटन थळांचेर पावोवपाची खात्री करपा खातीर कंपनीन शिकारा ऑपरेटरां वांगडा भागीदारी केल्या अशें स्विगीन सांगलें. ह्या ऑपरेटरांक डिलिव्हरी वेळ वाडोवपाचीय भरपाय दितात अशें कंपनीच्या प्रेसांत म्हणलां.
300 वयर रेस्टॉरंटां जोडलीं
स्विग्गी फूडचे नॅशनल हेड ऑफ बिझनेस सिद्धार्थ भाकू हांणी सांगलें, गिरायकाची सुवात पळोवन सेवा दिवपाच्या कंपनीच्या मिशनाची गवाय ‘स्विगी हाऊसबोट डिलिव्हरी’ आसा. स्विगी कंपनीन 2022 वर्सा श्रीनगरांत काम करपाक सुरवात केल्ली. कंपनीच्या प्लॅटफॉर्माचेर श्रीनगरांतल्या 300 परस चड रेस्टॉरंटांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
