भांगरभूंय | प्रतिनिधी
हे खेप तुमका एका वेगळ्याच विशया कडेन व्हरतां. सगले जाण चड पयशे मेळटा ते नोकरे फाटल्यानूच धांवतात. अर्थांत तातूंत चुकीचें कांय ना. पूण, हाका लागून जिणेचो अर्थ कळना. कळ्ळो तरी उसरां कळटा. पूण तेन्ना चड वेळ जाल्लो आसता. जगपाचो अर्थ जर बेगीन कळ्ळो जाल्यार पयशां खातीर जो त्रास, दुख्ख जाता, तें जावचें ना. हे खातीर म्हैसूरांतले स्वामी समरजी तुमकां आॅनलायन वर्गांत मार्गदर्शन करतात. एक म्हणल्यार, तांणी तरणाटेपणारुच स्वामी जावपाचें थारायलें. ह्या मळाचेर तुमकां त्याग तर करचोच पडटा, तशेंच दुसऱ्या जिवांत देव आसा, हें मतींत दवरचें पडटा. विशेश म्हणल्यार हो स्वामी पणजे, हरमला येता. जिणेंतलें खरेंपण कितें? हाचो सोद ह्या स्वामीच्या प्रवासांत लागता. हें एका नदरेन सत्य जाणून घेवपाची पद्दत जांकां कळटा ते अर्थीक फटवणुकींत केन्नाच बळी पडचे नात. खंयच्याय फांट्याचो विद्यार्थी हाचो विचार करूंक शकता.
खरें तर स्वाम्याचें जिणें कठीण म्हणल्यार ताका त्याग करचो पडटा. मनाचेर नियंत्रण दवरचें पडटा. ताच्या मनांत मात पसून सुवार्थ, दुस्वास, मोह, आसक्ती आसपाक फावना. खूबच कठीण, अशक्य अशी ही गजाल. अध्यात्माचेर तुमचो शेक आसूंक जाय. मार्गदर्शन करतना सोंपे पद्दतीन तें करपाची शैली तुमकां विकसीत करी पडटली. ह्या मळाचेर आतां शिकिल्ले लोक येतात. कांय जाण तर लाखांनी रुपयांचे नोकरेचेर उदक सोडून येतात. कितलो व्हडलो हो त्याग? स्वामी समर हांणी ल्हानपणारुच स्वामी जावपाचें थारायिल्ल्यान नोकरी करपाचो प्रस्नूच येवंक ना. ते सांगतात, ‘कोणुय ह्या मळाचेर येवं शकता. शिकिल्ले आसत तर चड बरें. स्वामी जावपाचें आसल्यार पयलीं घरांतल्या जाण्ट्यांक, आवय- बापायक सांगचें. ह्या मळाचेर तुमकां पगार मेळचो ना, पूण खरें कितें, हाचो अर्थ जरूर कळटलो.’ जर तुमकां कितें अडचणीं येत जाल्यार हो स्वामी समर तुमकां मजत करतलो.
स्वाम्यांक परखड उलोवचें पडटा. हाका वायट दिसतलें, ताका बरें दिसतलें, अशें तो केन्नाच करीना. जें चूक आसा तें तो सदांच प्रामाणीकपणान सांगता. हाची तांणी संवय दवरूंक जाय. स्वामी हो एक प्रकारान समाजाचो फुडारीच आसता. सगल्यांचें हीत तो पळयता. सुरवातीक आवड म्हूण तुमकां हो फांटो आवडूंक लागता. मागीर तुमी खोलायेन अभ्यास करतात. जेन्ना तुमकां संन्याशी जापाचें सपन पडटा, तेन्ना तें खरें करपाक समर स्वामीजींचें मार्गदर्शन उपेगी पडटलें. स्वामीजी सांगतात, ‘दुसऱ्यां मदीं देव आसता, ही भावनां आमचे मदीं जर येवपाक लागली तर गुन्यांवकारी, सुवार्थ, दुस्वासाची भावना उणी जावपाक मजत जातली. शिवराक जेवीत, सात्विक आहार घेत जाल्यार तुमचे विचार तशे जावपाक हातभार लागतलो. सध्या परिक्षा चालू आसात, ह्या काळांत शिवराक आहार घेवन पळोवचो. तुमकां चड फायदो जातलो. तुमकां जर संन्याशी जावपाचें आसा तर हांव तुमकां मार्गदर्शन करपाक तयार आसा. अध्यात्म सोंपें करून सांगप हें खूब कठीण काम. पूण तुमची तर खरेंच इत्सा आसत जाल्यार हें शक्य जावंक शकता.’
तेन्ना तुमची इत्सा आसा जाल्यार ह्या मळाचो विचार करचो. उच्च शिक्षण घेवपी विद्यार्थी आसत जाल्यार चड बरें. तुमी जरुर ह्या फांट्याचो विचार करचो. स्वामी संपूर्णानंद हांचे कडल्यान (फोन क्र. 89039 59395) तुमी चड म्हायती घेवपाक शकतात.
अटल टिंकरींग क्लब
गोंय शालांत मंडळाची बारावेची परिक्षा फाटल्या सोमारा सावन सुरू जाली. मानादिक प्रधानमंत्री नरेंद्र मोदीजी हांणी परिक्षा पे चर्चा ही आठवी खास कार्यावळ ते खातीर केल्ली. बजेट जाहीर जालां. तातूंतली एक गजाल घेवपा सारकी. अटल टिंकरींग क्लीबांची संख्या वाडोवपाची तजवीज आसा. ही येवजण विद्यार्थ्यां मदीं विज्ञान फांट्याची आवड निर्माण करपाक चड उपेगी जातली. दुर्दैवान गोंयांतल्या खूब उण्या शाळांनी हे येवजणेक प्रतिसाद दिला. स्मेम म्हलर सायन्स तंत्रगिन्यान, इंजिनियरींग आनी गणीत हे विशय चड म्हत्वाचे. विज्ञान फांट्यांत हाका स्थान आसता. ह्या विशया कडेन चड प्रमाणांत विद्यार्थी वचपाक जाय, ही जापसालदारकी विज्ञान शिक्षकाची. पूण शाळेंत अटल टिंकरिंग क्लब सुरू करपाची जापसालदारकी वेवस्थापनाची लेगीत आसता. ताचो लाव विद्यार्थ्यांक चड जातलो. देड हजार फूट इतली सुवात ते खातीर जाय पडटा. चड म्हायती तुमकां तांचे वेबसायटीचेर मेळटली.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
