भांगरभूंय | प्रतिनिधी
केरी-सत्तरी: मांद्रें हांगा बिद्रुबाग पारकरी मंडळ तशेंच कला आनी संस्कृती संचालनालय गोंय वतीन कार्तिकी एकादशी निमतान मांद्रें सप्ता निमतान पुणेंच्यो नामनेच्यो युवा गायिका कु. स्वानंदी चंद्रकांत नायक आनी गोंयच्यो कलाकार कु. अन्सिका चांगदेव नायक हांच्या गायनान रसिकांचेर मोनेळ घालो.
दिवचल म्हालांतल्या शिरगांव हांगा जल्मल्ले नामनेचे भजनी कलाकार गोंय राज्य सांस्कृतीक पुरस्कार फावो जाल्ले कलाकार सर्गेस्त धोंडू भिकू नायक हांची तीं नातरां आसात.
कु. स्वानंदी हिणें गायनाची सुरवात रागमाला तशेंच राग रागेश्री मदल्या तराणाने केली. जाल्यार एका परस एक सरस पदां गावन प्रेक्षकांचीं मनां जिखलीं.
पांडुरंग नामी, हृदयाच्या तालावर, बाजे मुरलीया, धावा घाली आई, अबीर गुलाल उधळीत रंग, आधी रचीली पंढरी, आम्हा न कळे ज्ञान, अवघे गरजे पंढरपूर अशीं एका परस एक सरस पदां गावन श्रोत्यांची तोखणाय मेळयली.
आपदा राज्यपदा, देवाघरचे ज्ञात कुणाला, जय शंकरा, युवती मना दारुण रण, घेई छंद मकरंद, सुरत पिया किन छिन् बिसराये, एकला नयनाला, माझे जीवन गाणे, तसेच पंडित जितेंद्र अभिषेकी बुवानी संगीत दिवन आनी गावन अजरामर केल्लें संत सुरदासांचे एक हिंदी भजन कु. स्वानंदी हिणें गावन कार्यावळीची सांगता केली.
कार्यावळीक हार्मोनियम साथ पंडित जितेंद्र अभिषेकी हांचे ज्येश्ठ शिश्य चंद्रकांत धोंडू नायक हांणी केली. ऑर्गन साथ चांगदेव धोंडू नायक, तबला साथ बुध्देश तळकार,पखवाज साथ शैलेश शिरोडकार, मंजिरी दत्तराज च्यारी हांणी केली. जाल्यार संजय सालेलकार हांणी कार्यावळीचें निवेदन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
