भांगरभूंय | प्रतिनिधी
काणकोण: श्रीनिराकार विद्यालय माशें, काणकोणचे आदले विद्यार्थी आनी स्वातंत्र्य सैनीक रामदास प्रभुगांवकार हांणी श्रीनिराकार शिक्षण संस्था संचलीत सगल्या शाळांक भेट दिवन शिक्षकां कडेन शाळेचे उदरगती विशीं चर्चा केली.
गांवडोंगरे संस्था संचलीत तुडल विद्यालयांत मुख्याध्यापक तुकाराम वेळीप, मुळावे शाळेचे मुख्याध्यापक सत्यवान गांवकार, श्रीनिराकार विद्यालयांत मुख्याध्यापक उर्वी फळदेसाय, आंगले उच्च माध्यमीक विद्यालयांत प्राचार्य हेमंत कामत आनी रेखा रामदास फेणे, मुळावे शाळेचे मुख्याध्यापक दिनेश वेळीप, रामदास प्रभुगांवकार आनी तांची घरकान्न राजश्री प्रभुगांवकार हांकां येवकार दिलो.
उपरांत शिक्षकां बरोबर जाल्ले चर्चेंत प्रभुगांवकार हांणी स्वातंत्र्य लढ्यांतलो काणकोणकारांचो वांटो, 15 ऑगस्ट 1955 दिसाचो पणजेंत जाल्लो सत्याग्राह, द गोवा हिंदू असोसिएशन मुंबय आनी स्नेह मंदीर बांदोडें ह्या संस्थेतचो तांचो वांटो अशा विवीध विशयांचेर तांणी उलोवप केलें.
तुडल विद्यालयाचे हें रुप्या महोत्सवी वर्स आशिल्ल्यान मुख्याध्यापक तुकाराम वेळीप हांणी शाळे वतीन प्रभुगांवकार हांकां यादस्तीक भेटयलें. पांच शिक्षणीक आस्थापनांचे हे भोंवडेचें आयोजन श्रीनिराकार शिक्षण संस्थेचे अध्यक्ष प्रशांत नायक हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
