भांगरभूंय | प्रतिनिधी
आयज आमी आमच्या देशाचो 77 वो स्वातंत्र्य दीस मनयतात. आयच्या दिसा म्हणल्यार 76 वर्सां पयलीं 15 ऑगस्ट 1947 ह्या दिसा आमचो भारत देश इंग्रजांच्या गुलामींतल्यान मुक्त जालो. ताचे पयलीं आमच्या देशाचेर इंग्रजांचें राज्य आशिल्लें. वेपारी म्हूण आयिल्ले इंग्रज पळयतां पळयतां ह्या देशाचे धनी जाले आनी कोट्यांनी भारतीयांक तांणी गुलाम केले. देश पारतंत्र्यांत गेलो. सुमार 150 वर्सां इंग्रजांनी आमच्या देशाचेर राज्य केलें. ह्या काळांत तांणी आमचो इतिहास, आमचो पराक्रम, आमचो स्वाभिमान सोंपोवपाचेंच काम केलें. ज्या देशांत भांगराचो धुंवर येतालो त्या देशाक कंगाल करपाचेंच काम तांणी केलें.
देशांतल्या नागरिकांक गुलामिची वागणूक दिली. गोरगरीब, सरळ मार्गान जगपी भारतांतल्या नागरिकांचेर तांणी सेगीत अत्याचार केलो. इंग्रजांच्या ह्या अन्याय अत्याचारान त्रस्त जाल्ल्या लोकांनी इंग्रजां आड पयलो उठाव केलो तो 1857 वर्सा. दुर्दैवान हो उठाव येसस्वी जावंक शकलो ना. तरी इंग्रजां आड झुजपा खातीर भारतीयांक प्रेरणा दिवपी हो थाराव थारलो. ह्या उठावांतल्यानूच प्रेरणा घेवन मुखार हजारांनी देशभक्त निर्माण जाले. कांय जाणांनी सशक्त क्रांतीन जाल्यार कांय जाणांनी अहिंसेच्या विधायक मार्गान इंग्रजां कडेन झूज दिलें. देशाक स्वातंत्र्य मेळोवन दिवपा खातीर हजारांनी क्रांतिकारांनी स्वताचें रगत सांडयलें. कांय जाण फांसार चडले, जाल्यार कांय इंग्रजांजाचे गुळयेन शहीद जाले.
कितल्याशाच जाणांनी बंदखण भोगली. कांय जाणांनी काळ्या उदकाची जाल्यार कांय जाणांनी जल्मठेपीची ख्यास्त भोगली. अशा कितल्याशाच ज्ञात, अज्ञात लोकांच्या बलिदानान देशाक स्वातंत्र्य मेळ्ळें. 15 ऑगस्ट 1947 दिसा रातच्या 12 वरांचेर दिल्लींतल्या लाल किल्ल्याचेर प्रधानमंत्री पंडित जवाहरलाल नेहरू हांणी तिरंगो हुबयलो आनी देशांत स्वातंत्र्याची नवी फांतोड उदेली. देशाक स्वातंत्र्य मेळून आयज 76 वर्सां पुराय जावन 77 व्या वर्सांत देश पावल घालता. 76 वर्सा हें खंयच्याय देशाचें मुल्यमापन करपा खातीर तसो उणो काळ. पूण इतल्या उण्या काळांत लेगीत आमचो देश संवसारांतलो सगल्यांत प्रगत देश म्हूण वळखतात. फाटल्या 76 वर्सांत आमच्या देशान सगल्या मळार दोळे दिपकावपी उदरगत केल्या.
कला, खेळ, विज्ञान, तंत्रज्ञान, साहित्य, शिक्षण, अर्थकारण, राजकारण, समाजकारण अशा सगल्या मळार भारतान स्वताची वेगळी वळख निर्माण केल्या. जो देश सूय लेगीत तयार करूंक शकना अशें मानताले, तो देश आयज चंद्राचेर स्वारी करता. भारतान मारिल्ली ही उंचाय पळोवन कोणाकूय दुस्वास दिसतलो अशीच आसा. संवसारांतलीं सगल्यांत व्हड लोकशाय म्हूण भारतीय लोकशाये कडेन पळयतात. देश स्वतंत्र जावन 76 वर्सां जालीं तरी आमचे लोकशायेक अजून लेगीत कसलेंच खत लागिल्लें ना. 26 जानेवारी 1950 सावन आमचो देश प्रजासत्ताक जालो. भारताचे संविधान डॉ. बाबासाहेब आंबेडकर हांचे सारक्या व्हड मनशान बरयलें. त्या संविधाना प्रमाणूच देशाचो कारभार चालू आसा. विवीध, जाती, धर्म, पंथाचे लोक ह्या देशांत आपुलकेन रावतात. दरेक प्रांताची भाशा वेगळी, भेस वेगळो, संस्कृती वेगळी अशें आसलें तरी भारतीय म्हूण सगले एक आसात हीच एकवट आमची वळख. वेगळ्योवेगळ्यो भाशा उलोवपी, वेगळ्योवेगळ्यो जाती, धर्माच्या 140 कोटी लोकांक एकठांय बांदून दवरपाचें काम आमच्या संविधानान केलां. म्हणूनच भारतीय संविधानाक संवसारांतलें सर्वोत्तम संविधान अशें समजतात.
भारता बरोबरूच स्वतंत्र्य जाल्ल्या आमच्या शेजारच्या देशाची आयज कसली अवस्था आसा हें आमी पळयतातूच. अवघ्या 76 वर्सांत भारत एक शक्तिशाली राष्ट्र म्हूण उदयाक आयलें. संवसारीक महासत्ता जावपा कडेन आमी पावलां मारीत आसात. उदरगतीची हीच घोडधांव अशीच चालू उरत जाल्यार फुडारांतल्या 25 वर्सांत भारत संवसारीक महासत्ता जातलो हातूंत मात लेगीत दुबाव ना. देशाच्या ह्या अमृत महोत्सवी स्वातंत्र्य दिसाची देशांतल्या भावा, भयणांक मना सावन शुभेत्सा! जय हिंद!! जय भारत!!!
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
