स्वातंत्र्य दिसा राज्यभर विवीध कार्यावळींचें आयोजन

भांगरभूंय | प्रतिनिधी

सुटके झुजार्‍यांचो मरणा उपरांत सत्कार

पणजी: सोमार, ता. 15 ऑगस्टाक स्वातंत्र्य दीस मनयतले. ह्या दिसा सकाळीं 9.15 वरांचेर पणजेच्या पोरण्या सचिवालया मुखार राज्य पांवड्यावेलो सुवाळो घडोवन हाडलो आनी गोंयचे मुख्यमंत्री डॉ. प्रमोद सावंत हे विशीं लोकांकडेन उलयतले. 

स्वातंत्र्य दिसा निमतान बावटो हुबोवपाचो सुवाळो विवीध म्हालांतल्या मुख्यालयांनी सकाळीं 9.15  वरांचेर जातलो. हातूंत पर्यटन मंत्री रोहन खंवटे म्हापशें, मयेंचे आमदार प्रेमेंद्र शेट दिवचले, शेती मंत्री रवी नायक फोंडें, उदकास्रोत मंत्री सुभाष शिरोडकार काणकोणा, वाहतूक मंत्री मावीन गोदिन्हो वास्को, विधिमंडळ मंत्री नीलेश काब्राल मडगांवां, पेडणेंचे आमदार प्रवीण आर्लेकार पेडणें, आमदार देविया राणे वाळपय, खेळां मंत्री गोविंद गावडे केपें, आमदार गणेश गांवकार धारबांदोडें आनी समाजकल्याण मंत्री सुभाष फळदेसाय, सांगें हांगा बावटो हुबोवपाचे कार्यावळींत वांटेकार जातले.

मुख्यमंत्री डॉ. प्रमोद सावंत सुटके झुजारी आनी हेर मानेस्तां वांगडा पत्रादेवी, पेडणें हांगा हुतात्मा स्मारकाचेर फुलां अर्पण करतले. 

सगळीं खातीं ’आझादी का अमृत महोत्सव’ च्या खाला 13 ऑगस्ट 2022 ते 15 ऑगस्ट 2022  ह्या काळांत स्वातंत्र्य दिसाच्यो कार्यावळी आयोजीत करतल्यो. ह्यो कार्यावळी दरेका म्हालांत आयोजीत करतले. हातूंत धांवप, चलप, खेळाची सर्त, ट्रॅक, रस्तोनाट्य, देशभक्तीचे भावनेन सांस्कृतीक गायनाच्यो कार्यावळी, शाळा-महाविद्यालयांत निबंध सर्त, वक्तृत्व सतर्र्, सायकल रॅली, झाडां लावप अश्यो कार्यावळी आयोजीत करतले. झाडां लावप, सॅनिटायझेशन ड्रायव्ह हातूंत सगळ्या पांवड्यावेल्या आनी खंयचेय पिरायेच्या लोकांक वांटो घेवपा खातीर प्रोत्साहीत करतले. 

ह्या संदर्भार गोंयच्या स्वातंत्र्य संघर्शाच्या हुतात्म्यांचो सरकार मरणा उपरांत सत्कार करतले. तिसवाडी तालुक्याच्या सुटके झुजार्‍यांचो राज्य पांवड्यावेले कार्यावळींत भोवमान करतले जाल्यार हेर स्वातंत्र्य झुजार्‍यांक त्या त्या तालुको पांवड्यावेल्या कार्यावळींत भोवमान करतले. हे विशीं सगळ्या हुतात्मांची एक पुस्तिका म्हायती आनी प्रसिध्दी खातें जाहीर करतलें.

13 ते 15 ऑगस्ट 2022 मेरेन देशांत हर घर तिरंगो – एक राष्ट्र, एक भावना, एक अस्मिताय मनयतले आनी लोकांक तांच्या घरांचेर/संस्थांनी/वेवसायीक उपक्रमांचेर बावटो हुबोवपाचें आवाहन केलां. दरेका शारांत/गांवांत वेगवेगळ्या सुवातींनी ध्वज उपलब्ध करून दिल्यात.