भांगरभूंय | प्रतिनिधी
शांताजी नायक गांवकार: काणकोण पालिके वतीन मल्लिकार्जून विद्यालयांत स्वातंत्र्याची 75 वर्सा निमतान कार्यावळ
काणकोण: भारत देशाच्या स्वातंत्र्या संबंदीचीं पुस्तकां नवे पिळगेन वाचचीं. हीं पुस्तकां वाचिल्ल्यान देशा खातीर बलिदान दिल्ल्या, सर्वस्व त्याग केल्ल्यांचो इतिहास समजून येतलो आनी ताची प्रेरणा मेळिल्ल्यान आदर्श नागरीक घडूंक शकता अशें निवृत्त मुख्याध्यापक शांताजी नायक गांवकार हांणी सांगलें.
भारत देश स्वतंत्र जावन 75 वर्सां पुराय जातात. ह्या अमृत महोत्सवी वर्साच्या समारोप सुवाळ्या निमतान केंद्र सरकारान ‘मेरी माटी मेरा देश, मिट्टी को नमन, विरों को वंदन’ ह्या कार्यावळी खाला विवीध कार्यावळींचें आयोजन केलां.
9 ऑगस्ट ते 30 ऑगस्ट मेरेन ही कार्यावळ चलतली. 15 ऑगस्ट मेरेन अशा कार्यावळींचें आयोजन पालिके वतीन केलां. त्या कार्यावळीचो एक वांटो म्हूण स्वातंत्र्य सैनिकाच्या नांवाची पाटी बसोवप, तांच्या कार्याची याद करून दिवप अशो कार्यावळी काणकोण नगरपालिकेन चार रस्तो हांगासरल्या श्रीमल्लिकार्जून विद्यालयाच्या मैदानार आयोजीत केल्ली.
ह्या वेळार स्वातंत्र्य सैनिकांचे यादी निमतान तयार केल्ल्या नांवतकट्याचें अनावरण केले उपरांत शांताजी नायक गांवकार उलयताले. ह्या वेळार नगराध्यक्ष रमाकांत नायक गांवकार, उपनगराध्यक्ष नादीन फर्नांडीस, काणकोणचे उपजिल्होधिकारी रमेश गांवकार, नगरसेवक धिरज नायक गांवकार, शुभम कोमरपंत, हेमंत नायक गांवकार, नगरसेविका नितू देसाय, सारा देसाय, अमिता पागी, पुलीस उपनिरिक्षक स्वदेश देसाय, विद्यालयाचे शिक्षक, विद्यार्थी आनी नागरीक हाजीर आशिल्ले.
हो देश स्वतंत्र करपाक ज्या ज्या स्वातंत्र्य सैनिकांनी कश्ट घेतलें ताची म्हायती नवे पिळगेक जावपाचे नदरेन देशभर अशा कार्यावळींचें आयोजन केल्ल्याचें उपजिल्होधिकारी रमेश गांवकार हांणी सांगलें.
स्वातंत्र्या संबंदीची म्हायती समजून घेवंक जाय. पर्यावरण सांबाळपा खातीर दरेकान एक झाड लावचें. तें झाड आमकां प्राणवाय दितलें आनी आमची भलायकी बरी उरतली. फक्त फुलांची झाडां लावं नाकात. जाण्टेल्यांची जमीन पडींग दवरूं नाकात अशें आवाहन नगराध्यक्ष रमाकांत नायक गांवकार हांणी केलें.
ह्या वेळार मुख्याध्यापिका वर्षा नायक गांवकार हांणीय आपले उलोवप केलें. ह्या वेळार येसो देसाय हांणी सगल्यांक सोपूत दिलो. कार्यावळीचें सुत्रसंचालन नम्रता देसाय हांणी केलें. जाल्यार येसो देसाय हांणी उपकार मानले.
आयज काणकोणां भलायकी शिबीर
मजगतीं, काणकोण लायन्स क्लबा वतीन व्हिक्टर हॉस्पिटलाच्या पालवान आयज (बिरेस्तारा) सकाळीं 10 ते 1 वरां मेरेन डॉ. धिल्लन देसाय हॉस्पिटलांत फुकट दोळ्यांची तपासणी आनी बायलां दुयेंसांच्या शिबिराचें आयोजन केलां. ह्या शिबिराचो सगल्यांनी लाव घेवचो अशें आवाहन लायन्स क्लबा वतीन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
