भांगरभूंय | प्रतिनिधी
आपल्या हक्काचें उदक पंजाब प्रांताक मेळत आशिल्ल्यान सिंध प्रांतातले लोक सुमारा भायर अस्वस्थ जाल्यात.
पाकिस्तानाच्या बलुचिस्तानांत स्वतंत्र बलुचिस्ताना खातीर बलुचिस्तानी नागरिकांनी सरकारा आड झूज सुरू करून आवाहन दिलां. बलुच लिबरेशन आर्मीन पाकिस्तानी लश्करा आड झुजाचो उलो मारून स्वतंत्र बलुचिस्तानाची घोशणा लेगीत केल्या. फाटल्या कांय म्हयन्यां सावन बलुच लिबरेशन आर्मी आनी पाकिस्तानी लश्कर हांचे मदीं संघर्श वाडत चल्ला. आतांय थंय व्हड प्रमाणांत हिंसाचार चालूच आसून बलुच नॅशनल आर्मीन बलुचिस्तानांतलो कांय भुंयेचो वाठार बळकायिल्ल्याची खबर आसा. बलुच आर्मी आनी पाकिस्तानी लश्कर हांचे मदीं खर झूज सुरू आसा. बलुचिस्तान लिबरेशन आर्मी कडेन झुजतना पाकिस्तान लश्कराक नाकापुरो जालां. शिमेर भारतीय लश्करा कडेन आनी शिमे भितर बलुचिस्तान लिबरेशन आर्मी कडेन झुजतना पाकिस्तान अक्षरशा भिकेकंगाल जाला. पाकिस्तानाची अर्थवेवस्था रसातळाक गेल्ल्यान पाकिस्तान जगांत भिकेचो कटोरो घेवन भोंवत आसा.
आंतरराष्ट्रीय नाणेनिधीन पाकिस्तानाक निधी दिल्लो आसलो तरी ते खातीर खूबश्यो अटी घाल्यात. पाकिस्तानांत म्हारगाय इतली वाडल्या की पाकिस्तानी नागरिकांक एकावेळाचें जेवण मेळप लेगीत कठीण जालां. म्हारगायेन लोक मेटाकुटेक आयल्यात. तातूंत भारतान सिंधू जल कबलात स्थगीत केल्ल्यान पाकिस्तानी नागरिकांचेर उदका खातीर वळवळे काडपाची वेळ आयल्या. जर भारतान ही जल कबलात पूर्ववत केली ना जाल्यार फुडारांत पाकिस्तानांत व्हड प्रमाणांत ‘पाणीबाणी’ निर्माण जावंक शकता. हाचेर उपाय म्हूण पाकिस्तानाच्या शरीफ सरकारान ग्रीन पाकिस्तान इनिशिएटीव्ह हो म्हत्वाकांक्षी प्रकल्प हातांत घेतला. सुमार साडेतीन हजार कोटी रुपयांचो हो प्रकल्प चीनाचे मजतीन पाकिस्तानांत जातलो. ह्या प्रकल्पाक पाकिस्तानाची दुसरी हरीत क्रांती अशें म्हणटात. ह्या प्रकल्पा खाला पाकिस्तानातल्या चेलिस्तान रेंवटातले सुमार 48 लाख एकर जमीन सिंचना खाला येतली. ते खातीर शेंकड्यांनी किलोमिटराचे कानाल काडटले. ह्या प्रकल्पा कडेन पाकिस्तान सरकाराचो ड्रीम प्रोजेक्ट म्हूण पळयतात. पूण होच प्रकल्प आतां पाकिस्ताना खातीर तकलीफोड जाला. कारण ह्या प्रकल्पाक सिंध प्रतांत येवपी उदक पंजाब प्रांतात वळोवपाचे आसात अशें सिंध प्रांतातल्या लोकांक दिसता. आपल्या हक्काचें उदक पंजाब प्रांताक मेळत आशिल्ल्यान सिंध प्रांतातले लोक सुमारा भायर अस्वस्थ जाल्यात. हेच अस्वस्थेंतल्यान थंयचे नागरीक रस्त्यार देंवून पाकिस्तान सरकारा आड आंदोलन करीत आसात.
भारत आनी बलुचिस्तान लश्करा मुखार हतबल जाल्ल्या शरीफ सरकारा मुखार ही नवी तकलीफोड उबी रावल्या. पाकिस्तानांतल्या सिंध प्रांतातले लोकूय आतां सरकारा आड रस्त्यार देंवून आंदोलन करीत आसात. हें आंदोलन लेगीत हिंसक जालां. कांय दिसां पयलीं तिडकल्ल्या आंदोलकांनी सिंध प्रांतांतल्या गृह मंत्र्याच्या घराक उजो लायिल्लो. ह्या वेळार जाल्ल्या फारपेटांत तीन नागरिकांक मरण लेगीत आयिल्लें. हें आंदोलन वाडतूच चल्लां. पाकिस्तान लश्कर आनी सरकारा मदीं पंजाबाचें वर्चस्व आसून तांचे सिंधाच्या विकासा कडेन वर्सानवर्स आडनदर जायत आशिल्ल्याची थंयच्या नागरिकांची कागाळ आसा. पाकिस्तान सरकार सिंध प्रांताचेर सेगीत अन्याय करीत आशिल्ल्याची भावना थंयच्या नागरिकांची जाल्या. ह्या अन्याया आड सिंध प्रांतांतले नागरीक आवाज काडीत आसात. इतलेंच न्हय जाल्यार ह्या आंदोलनांत सिंध प्रांतांतल्या नागरिकांनी स्वतंत्र सिंधू देशाची मागणी केल्या. ही मागणी आतांच न्हय जाल्यार फाटल्या कांय वर्सां सावन ते करीत आसात.
पाकिस्तानांतल्या सिंध प्रांतांत हिंधू धर्मीय लोक व्हड प्रमाणांत रावतात. ह्या नागरिकांचेर फाटल्या कांय वर्सां सावन अन्यायायाची माळ सुरू आसून ही अन्यायाची माळ सोंपची आनी सिंध प्रांतांतल्या हिंदू नागरिकांक तांचे अधिकार आनी हक्क मेळचे हे खातीर संवसारभरांतल्यान ह्या आंदोलनाक तेंको मेळत आसा. फाटल्या कांय काळांत पाकिस्तानांतल्या हिंदू बायलांचेर चड करून सिंधी हिंदू बायलांचेर अत्याचाराच्या घडणुकांनी सुमारा भायर वाड जाल्या. ह्या वाठारांतल्या चलयांक, बायलांक फटोवन, उबारून सक्तीन धर्मांतर करतात. वाडट्या अत्याचाराक लागून हांगाचे नागरीक सुमारा भायर त्रस्त जाल्यात. सेगीत सरकाराक विनंती करून लेगीत सरकार ताचे कडेन आडनदर करीत आशिल्ल्यान थंयचे नागरीक अस्वस्थ आशिल्ले. तातूंतच ह्या नव्या प्रकल्पाची भर पडिल्ल्यान थंयच्या नागरिकांची अस्वस्थताय आनीक वाडल्या. आपल्याचेर जावपी अन्याय पयस करपाचो आसत जाल्यार स्वतंत्र सिंधू देशा बगर पर्याय ना अशीच भावना थंयच्या नागरिकांची जाल्या. तातूंतल्यानूच स्वतंत्र सिंधू देशाची मागणी केली.
फाटल्याच वर्सा स्वतंत्र सिंधू देशाक भारत आनी अमेरिकेन तेंको दिवचो अशी विनंती केल्ली. ताचेर दोनूय देशांनी कसलीच प्रतिक्रिया दिवंक नासली तरी फुडारांत ह्या दोनूय आंदोलनकर्त्यांर्त्यांच्या ह्या मागणेची दखल घेवचीच पडटली, आनी जेन्ना हे दोनूय देश ह्या मागणेची दखल घेतले तेन्ना पाकिस्तानाचे आनीक तुकडे जाल्ले पळोवंक मेळटले. भारताचें तुकडे करपाचें सपन पळोवपी पाकिस्तानाचेच तुकडे जावपाची वेळ आयल्या. काश्मीराक स्वतंत्र करून भारताचे तुकडे करपाची सपनां पळोवपी पाकिस्तानाक बलुच आनी सिंध प्रांतातच स्वातंत्र्याची आंदोलनां जावंक लागिल्ल्यान पाकिस्तानाचे तुकडे जावपाची शक्यताय निर्माण जाल्या. फुडारांत पाकिस्तानांतूच बलुचिस्तान आनी सिंध हे दोन नवे देश निर्माण जायत जाल्यार अजाप दिसपा सारके कांयच ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
