भांगरभूंय | प्रतिनिधी
पेडणें: गोंयची धूव, समाज वावुरपी, स्वातंत्र्यसैनीक आनी अन्नपुर्णा महिला मंडळाची संस्थापिका पद्मश्री प्रेमा पुरव (88) मंगळारा 2 जुलयाक पुण्या आपल्या घरा संवसाराक अंतरली. पुण्याचे वैकुंठ मसुंडेंत कुडीचेर निमाणे संस्कार केले. तांचे इत्से प्रमाण कसलेच विधी करूंक नात.
पद्मश्री प्रेमा पुरव हांचो जल्म 15 ऑगस्ट 1935 ह्या दिसा गोंयांत जालो. तांचें आदलें नांव प्रेमा प्रभू तेंडुलकार. तांणी पिरायेच्या 12 व्या वर्सा आपलो भाव काशिनाथ हांचे वांगडा स्वातंत्र्य झुजांत उडी मारली. फुडें ती बेळगांवां भुंयगत रावू गोंय मुक्ती संग्रामांत वावुरल्यो. थंयच तांकां कॉम. कृष्णा मेणसे हांचे कडल्यान साम्यवादाची दीक्षा मेळ्ळी. उपरांत ती मुंबय शारांत आयली. थंय कम्युनिस्ट पक्षाच्या कम्युनांत कांय काळ राविल्ल्यो.
प्रेमा पुरव हांचें मोगांत पडून कॉम. दादा पुरव हांचे कडेन लग्न जालें. कॉम. दादा हे मुखार बँक कर्मचाऱ्यांची देशभरांतली व्हड संघटणा एआयबीईएचे मुखेल फुडारी जाले. प्रेमा पुरव आनी दादा पुरव दोगांनीय गोंय मुक्ती उपरांत संयुक्त महाराष्ट्राच्या लड्यांत वांटो घेतलो.
1960 च्या फुडल्या काळांत प्रेमा पुरव हांणी भारतीय महिला फेडरेशन, गिरणी कामगार युनियन, प्रतिकार संयुक्त महिला समितींत वावर केलो. 1975 वर्स आंतर राष्ट्रीय महिला वर्स म्हूण युनोन जाहीर केल्लें. ह्याच वर्सा प्रेमा पुरव, सरस्वतीबाई जगताप हांणी गिरण गांवांतल्या झुजारी बायलांक एकठांय करून अन्नपुर्णा महिला मंडळ ही खानावळ चलोवपी बायलांचे झुजारी संघटणेची स्थापना केली. हे संघटणेची स्थापना कॉम. दादा पुरव हांच्या मार्गदर्शना खाला जाली. जाल्लयार हे संघटणेची घटना कामगार चळवळीचे भीष्म पितामह कॉम. श्रीपाद अमृत डांगे हांणी बरोवन दिल्ली.
सुरवातीच्या काळांत अन्नपुर्णा महिला मंडळान खानावळ चलोवपी गरीब बायलांक सावकारांच्या चपक्यांतल्यान मुक्त करचे खातीर बँक रिणा कडेन जोडपाचें काम केलें. त्या वेळार आणिबाणीचो काळ आशिल्लो आनी वीस कलमी कार्यावळीची अंमलबजावणी चालू आशिल्ली. तातूंत उण्या कळंतरान दुर्बळ घटकांतल्या व्यक्तींक रीण दिवपाची येवजण अस्तित्वांत आयिल्ली. ताचो उपेग करून खानावळ चलोवपी हजारांनी बायलांक सावकाराचे तावडेंतल्यान मुक्त केलीं. 1982 त कॉम. दादा पुरव भायर पडले उपरांत आनी भव्य अश्या गिरणी कामगारांच्या संपा उपरांत प्रेमा पुरव बायलांच्या खाद्यपदार्थ वेवसायांत देंवली. तातूंत तांणी खूबश्या निराधार बायलांक सक्षम करपाचें काम फुडलीं 20- 22 वर्सां केलें.
प्रेमा पुरव हांची जल्मभूंय गोंय आनी कर्मभूंय महाराष्ट्र आशिल्ली. तांच्या वावरा खातीर तांकां 2002 त भारत सरकारान पद्मश्री हो चवथो सर्वोच्च भारतीय नागरी पुरस्कार भेटयलो. तेचवरी दुर्गाबाई देशमुख पुरस्कार, मंगेशकार प्रतिश्ठानाचो आनंदमयी पुरस्कार अशें खूबशे पुरस्कार फावो जाल्यात. तेचवरी तांकां अखील भारतीय महिला शिक्षण निधी संस्थेचो (एआयडब्ल्यूईएफए) स्त्री रत्न पुरस्कार, समाजीक कृतज्ञता निधी पुरस्कार भेटोवन भोवमान केल्लो.
फाटलीं 20 वर्सां प्रेमा पुरव पुण्या आपल्या धुवेच्या घरा निवृत्तीची जीण जगताली. प्रेमा आनी दादाक तीन धुवो आसात. डॉ. मेधा पुरव सामंत, विशाखा पुरंदरे, माधवी कोलांकरी ह्यो तांच्यो तीन धुवो, तीन जावंय, नातरां तशेंच खूबशे लागींचे सोयरेघायरे, बरे मागपी, कार्यकर्ते हे वैकुंठ मसुंडेंत प्रेमा पुरव हांकां निमाणो निरोप दिवपाक हाजीर राविल्ले.
प्रेमा पुरव हांची व्हडली धूव डॉ. मेधा पुरव सामंत हांणी अन्नपुर्णा परिवार ह्या माध्यमांतल्यान फाटल्या 30 वर्सांत पुणे, मुंबयच्या बायलांचें सक्षमीकरणाचें काम वाडयलां. बायलांच्या सक्षमीकरणाची चळवळ सेगीत चालू दवरप हीच प्रेमा पुरव हांकां खरी आर्गां थारतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
