भांगरभूंय | प्रतिनिधी
बँकां वतीन स्वयंसाहाय्य गटांक ३१२ कोटींचें रीण
पणजी : स्वयं साहाय्य गटाच्या वांगड्यांक अपघाती मरण विम्याचो लाव मेळटलो. हाका लागून १४१ विमा सखींची नोंदणी केल्या. बँकां कडल्यान राज्यांतल्या स्वयं साहाय्य गटांक ३१२ कोटींचें रीण वाटलां. स्वयंसाहाय्य गटांनी आतां मेरेन ४८० ब्रँड तयार केल्यात.
मुख्यमंत्री डॉ. प्रमोद सावंत हांचे अध्यक्षते खाला बिरेस्तारा गोंय राज्य ग्रामीण उदरनिर्वाह मोहीमेची (जीएसआरएलएम) बसका जाली. बसकेक ग्रामीण विकास यंत्रणां खात्याचे मंत्री गोविंद गावडे हजर आशिल्ले. स्वयंसाहाय्य गटांनी केल्ल्या उत्पादनांचे विक्रे खातीर मार्केटची स्थापना करतले.
राज्यांत ३२५० स्वयंसाहाय्य गट आशिल्ल्यान तांकां ८.२८ कोटींचो घोळटो निधी दिला. विवीध येवजण्यो ६० टक्के केंद्रीय निधी आनी ४० टक्के राज्य सरकाराच्या निधींच्या आधारार राबयतात. स्वयंसाहाय्य गटांचो आंकडो आनीक ३०० ते ४००नी वाडचो म्हणून यत्न करतले. कागदपत्रांच्या डिजीटायजेशनाचें काम हातांत घेतले.
मुख्यमंत्री अन्नपूर्णा येवजणे खाला स्वयंसाहाय्य गटांक सरकारी कँटीन्स चलोवपाक दितात. हातुंतल्या १४१ स्वयंसाहाय्य गटांक रोजगार मेळ्ळा. स्टार्ट अप विलेज उद्योजकता उपक्रमाचो ५ म्हालांतल्या २०३९ जाणांक लाव मेळ्ळा. लखपती दिदी सयत नमो द्रोण दिदी असल्या सगळ्या तरांच्या येवजण्यांची कार्यवाही राज्यांत जातली. लखपती दिदी येवजणेचो १७००० बायलांक लाव मेळोवन दिवपाचो हेत आसा, अशी म्हायती मुख्यमंत्री डॉ. प्रमोद सावंत हांणी बसके उपरांत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
